កណ្ដាល ៖ បណ្តាសិស្សានុសិស្សកំពុងសិក្សានៅថ្នាក់ទី១២ នៅថ្ងៃទី២ខែវិច្ឆិកានេះ បានសំដែងការបង្កើនខិតខំប្រឹងប្រែងរៀនសូត្រ និងសូមគាំទ្រប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា នៅថ្ងៃម្សិលមិញចំពោះការប្រកាសប្រឡងសញ្ញាបត្រមធ្យមសិក្សាទុតិយភូមិ ឬបាក់ឌុបឆ្នាំសិក្សា២០២១នេះ ​ត្រូវតែរៀបចំប្រឡងឆ្នាំនេះ​ដូច​ធម្មតា ដោយមិនមានអោយជាប់ទាំងស្រុងដូចឆ្នាំមុននោះទេ។

បណ្តាសិស្សានុសិស្សថ្នាក់ទី១២ វិទ្យាល័យ ហ៊ុន សែនតាខ្មៅ ក៏ដូចវិទ្យាល័យផ្សេងៗ បានថ្លែងថា ចាប់តាំងពី​ពួក​គេ​​បានចាប់ផ្តើមចូលសិក្សាថ្នាក់ទី១២មក បើទោះមានមេរោគកូវីដ១៩បង្កជាបញ្ហា​ប្រឈម​ក៏ដោយ ​ក៏ពួកគេទាំងអស់​គ្នា​បាន​ខិតខំប្រឹងប្រឹងស្វះស្វែងរកការរៀន​សូត្រតាម​ប្រព័ន្ធ​អេឡិចត្រូនិចផង ​និងនៅក្នុងថា្នក់ផងរហូតមកដល់បច្ចុប្បន្ន ​ហើយ​ពួកគេនៅតែបន្តបង្កើន​ការ​ខិតខំរៀន​រហូតដល់ថ្ងៃប្រឡងសញ្ញាបត្រមធ្យមសិក្សាទុតិភូមិនៅថ្ងៃទី៦​ ខែធ្នូខាងមុខនេះ ។

សិស្សថ្នាក់ទី១២ ថ្លែងថា ​ប្រសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្ត្រីកម្ពុជា​នៅ​ថ្ងៃ​ម្សិល​មិញ គេចាត់ទុកថា ជាការដាសតឿនក្រើនរំលឹកដ៏ល្អបំផុត ហើយវាក៏មិនទាន់​ហួស​ពេលសម្រាប់​សិស្សដែល​ស្នើ​សម្តេច​សុំ​ជាប់​ដោយស្វ័យប្រវត្តិ ខណៈការប្រឡងបាក់ឌុប​នៅ​សល់ពេលវេលារហូតជាង ១ខែទៀតឯណោះ។

តាមប្រសាសន៍សម្តេចតេជោ ហ៊ុន សែន នៅក្នុងពិធីប្រកាសបិទយុទ្ធនាការ ចាក់វ៉ាក់សាំង​ជំងឺ​កូវីដ១៩ សម្រាប់​អ្នក​មាន​អាយុ ៦ឆ្នាំឡើង និងបើកយុទ្ធនាការចាក់សម្រាប់ ​កុមារអាយុ៥ឆ្នាំ នាព្រឹកថ្ងៃទី១ ខែវិច្ឆិកា​ ឆ្នាំ២០២១ សម្តេច​ បាន​ប្រកាសអោយរៀបចំការប្រឡងសញ្ញាបត្រមធ្យម​សិក្សាទុតិយភូមិ​ ហើយក៏សូមផ្តាំផ្ញើអោយក្មួយៗ ​ចៅៗ ដែល​ជា​សិស្ស​ថ្នាក់ទី១២ទាំងអស់​សូមផ្តល់ការយោគយល់​ និងត្រូវបានខិតខំរៀនត្រៀមប្រឡង​ដើម្បីអនាគតរបស់ខ្លួន។

សូមបញ្ជាក់ថា នៅក្នុងឆ្នាំសិក្សាឆ្នាំ២០២០ កន្លងទៅនេះ ការប្រឡងសញ្ញាបត្រមធ្យមសិក្សា​ទុតិយភូមិ ត្រូវ​បាន​អាក់​ខាន​មិនបានប្រឡង​ ដោយសារកម្ពុជា ជួបរងការផ្ទុះរាតត្បាត​មេរោគ​កូវីដ១៩ខ្លាំង​នៅក្នុងសហគមន៍ ហើយកាល​នោះ​សិស្ស​ថ្នាក់​ទី១២ ត្រូវបានអោយជាប់ជាស្ថាពរទាំង​អស់​ដោយគ្មាននិទ្ទេស ​ខណៈសិស្សានុសិស្ស​កាល​នោះ​គឺ​បាន​ខិត​ខំ​ប្រឹង​ប្រែង​រៀន​សូត្របាន​ច្រើនជាង​នៅក្នុងឆ្នាំនេះ៕

អត្ថបទ ស៊ុម សុខជា