អ្នករៀបចំ និងអាជ្ញាធរក្នុងតំបន់បាននិយាយនៅថ្ងៃសុក្រ (២៧ ធ្នូ) នេះថា នាវិក ២នាក់ ត្រូវបានសម្លាប់នៅក្នុងឧបទ្ទវហេតុដាច់ដោយឡែកពីគ្នានៅក្នុងព្រឹត្តិការណ៍ប្រណាំងទូកពីទីក្រុងស៊ីដនី ទៅដល់ក្រុងហូបាត (Sydney to Hobart Race) ដែលជាការបាត់បង់ជីវិតលើកដំបូងក្នុងការប្រណាំងនៅមហាសមុទ្រដ៏ល្បីល្បាញចាប់តាំងពីឆ្នាំ១៩៩៨ មក។

អ្នករៀបចំបាននិយាយនៅក្នុងសេចក្តីថ្លែងការណ៍មួយថា សមាជិកនាវិកទាំង ២នាក់នោះ បានស្លាប់បន្ទាប់ពីត្រូវបានបុកដោយក្ដោងរបស់ទូក ដែលជាបង្គោលផ្តេកដែលទប់ក្ដោង និងយោលទៅមកអាស្រ័យលើទិសដៅនៃខ្យល់

អ្នកស្លាប់នោះនៅលើទូកផ្សេងគ្នាគឺទូក Flying Fish Arctos និងទូក Bowline ស្របពេលអាកាសធាតុមិនល្អបានបង្ខំឱ្យទូកជាច្រើនត្រូវដកខ្លួនពីការប្រណាំងលើកទី៧៩ ដែលបានចាប់ផ្តើមកាលពីថ្ងៃព្រហស្បតិ៍ ២៦ ធ្នូ។

ការបាត់បង់ជីវិតលើកចុងក្រោយក្នុងព្រឹត្តិការណ៍នេះបានកើតឡើងក្នុងឆ្នាំ១៩៩៨ នៅពេលទូកកម្សាន្តដ៏ប្រណិតចំនួន ៥គ្រឿងបានលិច ហើយនាវិក ៦នាក់បានស្លាប់បន្ទាប់ពីព្យុះដ៏ធំមួយបានវាយប្រហារ។ មានអ្នកស្លាប់ចំនួន ១៣នាក់ នៅក្នុងប្រវត្តិសាស្ត្រ ៧៩ឆ្នាំនៃការប្រណាំងនេះ ដោយ ៤នាក់ក្នុងចំណោមអ្នកស្លាប់ទាំងនោះ បណ្តាលមកពីការគាំងបេះដូង៕