​បាល់ទាត់៖ ​លោក Nuno Espirito Santo ត្រូវបាន​បណ្តេញ​ចេញពី​តំណែង​អ្នកចាត់ការ​របស់​ក្លិប​ Tottenham Hotspur ហើយ​នៅ​ថ្ងៃ​ចន្ទ​ម្សិលមិញ​នេះ​ក្រោយ​ដឹកនាំ​បាន​ត្រឹម ៤ខែ​។ ​​ជាមួយគ្នា​នោះដែរ​បេក្ខភាព​បន្ត​តំណែង​លោក Antonio Conte ត្រូវបាន​គេ​ដឹងថា​បានមក​ដល់​ទឹកដី​ទីក្រុង​ឡុង​ដ៍ហើយ​ដើម្បី​ចរចា​។

​​Spurs បាន​រង​បរាជ័យ ៥ ក្នុងចំណោម ៧ប្រកួត​ចុងក្រោយ​ធ្លាក់ខ្លួន​ដល់​លេខ ៨ ក្នុង​តារាង​តាម​ពីក្រោយ​ក្រុម​កំពូល​តារាង Chelsea ១០ពិន្ទុ​។ ​​បុរស​វ័យ ៤៧ឆ្នាំ​រូបនេះ​ត្រូវបានតែងតាំង​ឱ្យ​ដឹកនាំ Spurs កាលពី​ខែមិថុនា​កន្លងទៅ​ជាមួយ​នឹង​កិច្ចសន្យា ២ឆ្នាំ ក្រោយ​ចំណាយពេល ៤ឆ្នាំ​ជាមួយ Wolverhampton​។ ​​បរាជ័យ​របស់ Spurs ចុងក្រោយ​បំផុត​គឺ​ចាញ់​បិសាច​ក្រហម Manchester United ៣-០ ក្នុង​ទឹកដី​ខ្លួនឯង​កាលពី​ថ្ងៃ​សៅរ៍ ហើយ​សរុប​ស្ថិតិ​ដឹកនាំ​របស់​អ្នកចាត់ការ​សញ្ជាតិ​ព័រទុយហ្កាល់​រូបនេះ​រួមមាន​ឈ្នះ ៨ប្រកួត ស្មើ២ និង​ចាញ់ ៧ប្រកួត​។​ ​​អតីត​អ្នកចាត់ការ Chelsea លោក Antonio Conte ត្រូវបាន​គេ​ដឹងថា​ ជា​បេក្ខភាព​ឈានមុខ​គេ​ក្នុងការ​ត្រលប់មក​ដឹកនាំ​នៅ​ទឹកដី​ទីក្រុង​ឡុង​ដ៍​សារជាថ្មី​។

​​បន្ទាប់ពី​បញ្ចប់​តំណែង​លោក Jose Mourinho, Spurs ក៏​ធ្លាប់បាន​ចរចា​ជាមួយ​លោក Antonio Conte ដែរតែ​មិន​ត្រូវរ៉ូវ​គ្នា​។ ​​រំលឹកថា ​លោក Antonio Conte ធ្លាប់​ដឹកនាំ​នៅ​អង់គ្លេស​ពី​ឆ្នាំ២០១៤-១៦ ជួយ Chelsea លើក​ពាន English Premier League មុនពេល​ចាកចេញ​ទៅកាន់ Inter Milan ដែល​លោក​បាន​ដឹកនាំ​ក្រុម​ឈ្នះ​ពាន Italia Serie A រដូវ​កាល​មុន​៕

​អត្ថបទ​៖​នាង សុភា​វុ​ធ