ការពិភាក្សាដ៏ក្តៅគគុកមួយកំពុងលាតត្រដាងអំពីតួនាទី និងការទទួលខុសត្រូវរដ្ឋធម្មនុញ្ញរបស់ប្រធានាធិបតីស្តីទីកូរ៉េខាងត្បូង លោក Han Duck-soo ដែលបានទទួលតំណែង បន្ទាប់ពីការផ្អាកតួនាទីរបស់លោកប្រធានាធិបតី Yoon Suk Yeol កាលពីថ្ងៃទី១៤ ខែធ្នូ។

ចំណុចសំខាន់នៃភាពចម្រូងចម្រាសមានសំណួរសំខាន់មួយគឺថា តើលោក Han ដែលក៏កាន់តំណែងជានាយករដ្ឋមន្ត្រីផងដែរនោះ គួរតែត្រូវចាត់ទុកជាប្រធានាធិបតី ឬជានាយករដ្ឋមន្ត្រី នៅពេលប្រឈមមុខនឹងការបោះឆ្នោតចោទប្រកាន់ទម្លាក់តំណែង? ចម្លើយមានផលប៉ះពាល់យ៉ាងខ្លាំងចំពោះអភិបាលកិច្ចប្រទេស ដែលកំពុងរងនូវភាពទំនេរនៃអំណាចរួចទៅហើយ។

គណបក្សប្រជាធិបតេយ្យកូរ៉េ ដែលជាបក្សប្រឆាំងដ៏សំខាន់អះអាងថា ខ្លួនអាចចោទប្រកាន់ទម្លាក់តំណែងប្រធានាធិបតីស្តីទីរូបនេះយ៉ាងងាយបំផុតដោយសំឡេងភាគច្រើន ១៥១ក្នុងរដ្ឋសភា។ នៅក្នុងសភាដែលមានសមាជិក ៣០០រូប គណបក្សប្រជាធិបតេយ្យមាន ១៧០អាសនៈរួចទៅហើយ ដែលមានន័យថា ខ្លួននឹងទម្លាក់តំណែងលោក Han បានដោយខ្លួនឯង ប៉ុន្តែប្លុកកាន់អំណាចទាមទារសំឡេងភាគច្រើនចំនួន ២០០ ដើម្បីអនុវត្តញត្តិនោះ។

ប្រសិនបើការចោទប្រកាន់ទម្លាក់តំណែងត្រូវបានអនុម័តនៅថ្ងៃទី ២៧ ខែធ្នូ នេះ លោក Han នឹងត្រូវផ្អាកតួនាទីទាំងនាយករដ្ឋមន្ត្រី និងជាប្រធានាធិបតីស្តីទី ដោយឧបនាយករដ្ឋមន្ត្រី និងជារដ្ឋមន្ត្រីក្រសួងយុទ្ធសាស្ត្រ និងហិរញ្ញវត្ថុ លោក Choi Sang-mok ទទួលបន្ទុកលើតួនាទីទាំងពីរនោះជំនួសវិញ៕