ក្រសួងការបរទេសរបស់ប្រទេសនេះ បាននិយាយថា អាជ្ញាធរចិន បានដាក់ទណ្ឌកម្មលើក្រុមហ៊ុនឧស្សាហកម្មយោធាអាមេរិកចំនួន ៧ និងថ្នាក់គ្រប់គ្រងរបស់ពួកវា ជុំវិញការផ្គត់ផ្គង់អាវុធដល់កោះតៃវ៉ាន់។

យោងតាមសេចក្តីថ្លែងការណ៍បានឲ្យដឹង វិធានការដែលបានលើកឡើងនេះ នឹងចូលជាធរមាន នៅថ្ងៃទី ២៧ ខែធ្នូនេះ ហើយត្រូវបានចាត់ឡើងប្រឆាំងនឹងក្រុមហ៊ុន Aerkomm, Hudson Technologies, Insitu, Oceaneering International, Raytheon Australia, Raytheon Canada និង ក្រុមហ៊ុនSaronic Technologies ។ ទណ្ឌកម្មបង្កកអចលនទ្រព្យ និងទ្រព្យសកម្មផ្សេងទៀតនៅក្នុងប្រទេសចិនរបស់ក្រុមហ៊ុនទាំងនេះ និងបុគ្គលមួយចំនួន។ ពួកគេក៏ហាមឃាត់អង្គភាព និងបុគ្គលរបស់ចិនពីការចូលរួមក្នុងប្រតិបត្តិការណាមួយ កិច្ចសហប្រតិបត្តិការ ឬទម្រង់ផ្សេងទៀតនៃការទំនាក់ទំនងជាមួយពួកគេ។

ក្រសួងការបរទេស បានចង្អុលបង្ហាញថា៖«នាពេលថ្មីៗនេះ សហរដ្ឋអាមេរិក បានប្រកាសជាថ្មីម្តងទៀតនូវការផ្តល់ជំនួយក្នុ ងបរិមាណដ៏ច្រើនក្នុងទម្រង់ជាអាវុធ ក៏ដូចជាការលក់អាវុធទៅឲ្យកោះតៃវ៉ាន់»។ យោងតាមក្រសួង សេចក្តីព្រាងថវិកាការពារជាតិរបស់សហរដ្ឋអាមេរិកសម្រាប់ឆ្នាំសារពើពន្ធ ២០២៥ «មានបទប្បញ្ញត្តិអវិជ្ជមានមួយចំនួនទាក់ទងនឹងប្រទេសចិន ដែលបំពានយ៉ាងធ្ងន់ធ្ងរលើគោលការណ៍ «ចិនតែមួយ»។

សេចក្តីថ្លែងការណ៍ បានសង្កត់ធ្ងន់ថា៖«នេះគឺជាការជ្រៀតជ្រែកយ៉ាងធ្ងន់ធ្ងរ នៅក្នុងកិច្ចការផ្ទៃក្នុងរបស់ប្រទេសយើង វាធ្វើឲ្យប៉ះពាល់យ៉ាងធ្ងន់ធ្ងរដល់អធិបតេយ្យភាព និងបូរណភាពទឹកដីរបស់យើង»។