ប្រធានាធិបតីរុស្ស៊ី លោក Vladimir Putin កាលពីថ្ងៃព្រហស្បតិ៍ (ទី២៦ ខែថ្នូ) បាននិយាយថា មិនមានពេលនៅសល់ទៀតនោះទេ នាឆ្នាំនេះ ដើម្បីចុះហត្ថលេខាលើកិច្ចព្រមព្រៀងឧស្ម័នថ្មីឆ្លងកាត់អ៊ុយក្រែន ហើយបានទម្លាក់កំហុសចំៗទៅលើអ៊ុយក្រែនថា បានបដិសេធមិនបន្តកិច្ចព្រមព្រៀងដែលបញ្ចូនឧស្ម័នទៅកាន់ប្រទេសស្លូវ៉ាគី សាធារណរដ្ឋឆេក និងអូទ្រីស។

អំឡុងសន្និសីទទូរទស្សន៍មួយ អមដោយការបន្ថែមថា ទីក្រុងគីវ កំពុងដាក់ទណ្ឌកម្មអឺរ៉ុប ដោយចំណាត់ការនោះ លោក Putin បាននិយាយថា៖ «ពួកគេបានប្រកាសថា ពួកគេនឹងមិនបន្តកិច្ចសន្យាទេ។ មិនមានកិច្ចសន្យាថ្មីទេ ហើយវាមិនអាចទៅរួចនោះឡើយ ក្នុងការបញ្ចប់កិច្ចសន្យាមួយ ក្នុងរយៈពេលតែ ៣-៤ ថ្ងៃនោះ»។

គួរបញ្ជាក់ថា កិច្ចព្រមព្រៀងឧស្ម័នឆ្លងកាត់រយៈពេល ៥ឆ្នាំ នាពេលបច្ចុប្បន្ន រវាងរុស្ស៊ី និងអ៊ុយក្រែន នឹងផុតកំណត់នៅចុងឆ្នាំនេះ។

ការពិតទៅ ការផ្គត់ផ្គង់ឧស្ម័នរបស់រុស្ស៊ីទៅអឺរ៉ុប ឆ្លងកាត់តាមរយៈអ៊ុយក្រែន មានចំនួនតិចតួចណាស់។ រុស្ស៊ីបានបញ្ចូនឧស្ម័នប្រមាណជា ១៥ពាន់លានម៉ែត្រគូប ឆ្លងកាត់អ៊ុយក្រែន ក្នុងឆ្នាំ២០២៣ ពោលគឺមានតែ ៨ភាគរយប៉ុណ្ណោះនៃបរិមាណហ្គាសខ្ពស់បំផុតដែលមានលំហូរទៅកាន់អឺរ៉ុប តាមរយៈផ្លូវផ្សេងៗ ក្នុងឆ្នាំ ២០១៨-២០១៩៕