រដ្ឋមន្ត្រីក្រសួងការពារជាតិនៃប្រទេសនេះ លោកនាយឧត្តមសេនីយ៍ Phan Van Giang បានថ្លែងអំឡុងដំណើរទស្សនកិច្ចរបស់អនុរដ្ឋមន្ត្រីក្រសួងការពារជាតិរុស្ស៊ី លោកឧត្តមសេនីយ៍ឯក Alexander Fomin ថា ប្រទេសវៀតណាម ប្តេជ្ញាពង្រឹង និងអភិវឌ្ឍន៍បន្ថែមទៀតនូវកិច្ចសហប្រតិបត្តិការលើវិស័យការពារជាតិជាមួយរុស្ស៊ី។ យោងតាមសារព័ត៌មានកងទ័ព Quan Doi Nhan Dan។ 

លោករដ្ឋមន្ត្រីក្រសួងការពារជាតិវៀតណាម បានសង្កត់ធ្ងន់ថា ប្រជាជនវៀតណាម និងកងទ័ពប្រជាជនវៀតណាម «ជានិច្ចកាលវាយតម្លៃខ្ពស់ និងអរគុណចំពោះការគាំទ្រ និងជំនួយដ៏ធំធេងដែលរុស្ស៊ីផ្តល់ឲ្យក្នុងកិច្ចខិតខំប្រឹងប្រែងឆ្ពោះទៅរកឯករាជ្យជាតិ និងការបង្រួបបង្រួមជាតិ ក៏ដូចជាក្នុងការការពារមាតុភូមិ និងការកសាងឡើងវិញ។ 

ភាគីទាំងពីរ បានអះអាងថា កិច្ចសហប្រតិបត្តិការលើវិស័យការពារជាតិគឺជាសសរស្តម្ភសំខាន់នៃទំនាក់ទំនងវៀតណាម-រុស្ស៊ី។ យោងលោកនាយឧត្តមសេនីយកងទ័ពវៀតណាមបានឲ្យដឹង ប្រជាជាតិទាំងពីរ នឹងបន្តពង្រីកកិច្ចសហប្រតិបត្តិការលើវិស័យការពារជាតិក្នុងក្របខ័ណ្ឌនៃទំនាក់ទំនងមិត្តភាពប្រពៃណី និងភាពជាដៃគូយុទ្ធសាស្ត្រលើគ្រប់ជ្រុងជ្រោយ ក្រោមច្បាប់អន្តរជាតិ។ កាសែតនេះ បានរាយការណ៍ថា ការធ្វើបែបនេះ នឹងបង្កើនប្រសិទ្ធភាពនៃយន្តការសហប្រតិបត្តិការដែលមានស្រាប់ ព្រមទាំងពង្រឹង ពង្រីក និងធ្វើឲ្យទំនាក់ទំនងកាន់តែស៊ីជម្រៅរវាងកងកម្លាំងប្រដាប់អាវុធវៀតណាម និងរុស្ស៊ី ឆ្ពោះទៅមុខ។

រដ្ឋមន្ត្រីក្រសួងការពារជាតិវៀតណាម បានកោតសរសើរចំពោះលទ្ធផលនៃកិច្ចសន្ទនាយុទ្ធសាស្ត្រការពារជាតិវៀតណាម-រុស្ស៊ីលើកទី៧ ដែលបានប្រព្រឹត្តទៅ នៅទីក្រុងហាណូយ ជាមួយលោក Fomin និងសមភាគីវៀតណាម គឺលោកឧត្តមសេនីយ៍ឯក Hoang Xuan Chien។ ពួកគេបានរាយការណ៍ថា បានចូលរួមក្នុងការផ្លាស់ប្តូរទស្សនៈបើកចំហលើបញ្ហាសកល និងតំបន់ដែលមានការព្រួយបារម្ភទៅវិញទៅមក វាយតម្លៃលទ្ធផលនៃកិច្ចសហប្រតិបត្តិការលើវិស័យការពារជាតិសម្រាប់ឆ្នាំបច្ចុប្បន្ន និងកំណត់អាទិភាពសម្រាប់រយៈពេលខាងមុខ។