ប្រធានាធិបតីស្តីទីថ្មីរបស់កូរ៉េខាងត្បូងលោក Choi Sang-mok បាននិយាយនៅថ្ងៃសុក្រនេះថា រដ្ឋាភិបាលរបស់លោកបានបញ្ជាឲ្យយោធាបង្កើនការប្រុងប្រយ័ត្នខ្ពស់ ដោយលើកឡើងពីលទ្ធភាពដែលកូរ៉េខាងជើងអាចឆ្មក់ឱកាសពីស្ថានភាពនយោបាយរបស់ខ្លួន ដើម្បីធ្វើសកម្មភាពបង្ករឿងណាមួយ ។

លោក Choi ដែលជារដ្ឋមន្រ្តីក្រសួងហិរញ្ញវត្ថុកូរ៉េខាងត្បូងដែរនោះ បានធ្វើសេចក្តីអត្ថាធិប្បាយបែបនេះ នៅក្នុងសេចក្តីថ្លែងការណ៍មួយ ក្រោយក្លាយជាប្រធានាធិបតីស្តីទីទី ២របស់កូរ៉េខាងត្បូង ក្នុងរយៈពេល ២សប្តាហ៍ ក្រោយតំណាងរាស្រ្តបោះឆ្នោតចោទប្រកាន់មេដឹកនាំស្តីទីលោកនាយករដ្ឋមន្រ្តី Han Duck-soo ជាហេតុធ្វើឲ្យមានភាពពុំច្បាស់លាស់នៅក្នុងប្រទេសមហាអំណាចសេដ្ឋកិច្ចធំបំផុតទី ៤នៅអាស៊ីមួយនេះ ។

ការចោទប្រកាន់លោក Han ដែលបានក្លាយជាប្រធានាធិបតីស្តីទី ក្រោយលោកអតីតប្រធានាធិបតី Yoon Suk Yeol ត្រូវបានចោទប្រកាន់កាលពីថ្ងៃទី ១៤ សម្រាប់ការប្រកាសច្បាប់អាជ្ញាសឹករបស់លោកកាលពីថ្ងៃទី ៣ ខែធ្នូនោះ បានរុញច្រានប្រទេសដែលធ្លាប់តែមានប្រជាធិបតេយ្យដ៏រស់រវើកមួយនេះ ធ្លាក់ទៅក្នុងស្ថានភាពមិនច្បាស់លាស់ ។ 

ការបោះឆ្នោតចោទប្រកាន់លោក Han បានកើតមានឡោះង ក្រោយរូបលោកបដិសេធន៍ភ្លាមៗមិនតែងតាំងចៅក្រម ៣រូប ដើម្បីបំពេញតំណែងទំនេរនៅក្នុងតុលាការធម្មនុញ្ញ ដោយលោកលើកឡើងថា វាហួសពីតួនាទីរបស់លោក ៕