ភ្នំពេញ៖ ក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល (វ.ស.ស) បើកយុទ្ធនាការបាញ់ថ្នាំសម្លាប់មេរោគ សរុបបានចំនួន ២២៤ ទីតាំង នៅលើផ្ទៃក្រឡាប្រមាណ ៣លានម៉ែត្រការ៉េ ស្ថិតនៅទីតាំងដែលមានហានិភ័យខ្ពស់ ដែលនឹងអាចកើតមានការឆ្លងជំងឺកូវីដ-១៩។
ឯកឧត្តម កឹមរ័ត្ន វិសិដ្ឋ រដ្ឋលេខាធិការទីស្តីការគណៈរដ្ឋមន្ត្រី និងជាប្រធានក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល (វ.ស.ស) លើកឡើងនៅក្នុងពិធីសំណេះសំណាល ជាមួយតំណាងអង្គការសង្គមស៊ីវិល នៅថ្ងៃទី១ ខែវិច្ឆិកា ឆ្នាំ២០២១ នេះថា ក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល គឺជាអង្គភាពសម្របសម្រួលការងារសង្គមស៊ីវិលនៅកម្ពុជា តែងតែកៀរគរនូវជំនួយសប្បុរសធម៌ និងមនុស្សធម៌នានា តាមរយៈដៃគូសង្គមស៊ីវិលទាំងជាតិ និងទាំងអន្តរជាតិ ក្នុងការចូលរួមលើកកម្ពស់ជីវភាពរស់នៅ និងបំពេញនូវតម្រូវការជាក់ស្តែងរបស់ប្រជាជនកម្ពុជា ក្នុងស្មារតីចូលរួមយ៉ាងសកម្មជាមួយរាជរដ្ឋាភិបាលកម្ពុជា។
ឯកឧត្តម បន្តថា ជាក់ស្តែងស្ថិតនៅក្នុងការរីករាលជំងឺកូវីដ ១៩ នេះ ក្រុមប្រឹក្សាភិបាលនៃវេទិកាសម្ព័ន្ធសង្គមស៊ីវិល (វ.ស.ស) បានផ្តើមយុទ្ធនាការបាញ់ថ្នាំសម្លាប់មេរោគកូវីដ-១៩ ជុំទី៣ គឺបញ្ចប់បេសកកម្មដោយនៅទូទាំងប្រទេស ក្នុងនោះជាលទ្ធផល វ.ស.ស បានបាញ់ថ្នាំសម្លាប់មេរោគនៅទីតាំងសរុបចំនួន ២២៤ទីតាំង គិតជាផ្ទៃក្រឡាស្មើនឹងប្រមាណ ៣ លានម៉ែត្រការ៉េ ចំពោះទីតាំងដែលបានបាញ់ថ្នាំសម្លាប់មេរោគភាគច្រើន គឺជាទីតាំងមណ្ឌលចត្តាឡីស័ក មណ្ឌលព្យាបាលជំងឺកូវីដ-១៩ កម្រិតស្រាល ផ្សារ សាលារៀន មន្ទីរពេទ្យ និងទីកន្លែងសាធារណៈផ្សេងទៀត ដែលសុទ្ធតែជាទីតាំងដែលមានហានិភ័យខ្ពស់ដែលអាចកើតមានការឆ្លងជំងឺកូវីដ-១៩។
ឯកឧត្តម កឹមរ័ត្ន វិសិដ្ឋ បន្តថា ចំពោះបញ្ហានេះ (វ.ស.ស) តែងតែលើកទឹកចិត្តដល់អង្គការដៃគូរទាំង ក៏ដូចជាអង្គការសង្គមស៊ីវិលផ្សេងៗ នៅក្នុងព្រោះរាជាណាចក្រកម្ពុជា គឺឲ្យពួគគាត់ចូលរួមចំណែកក្នុងការអភិវឌ្ឍន៍សង្គម សេដ្ឋកិច្ច ជាមួយរាជរដ្ឋាភិបាល ក្រោមការដឹកនាំប្រកបដោយគតិបណ្ឌិតរបស់សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ជាពិសេសការពង្រឹងដល់ការងារទប់ស្កាត់ជំងឺកូវីដ ១៩ ជាដើម ។ នៅក្នុងកម្មវិធីនេះ (វ.ស.ស) បានផ្តល់សម្ភារៈប្រើប្រាស់ចាំបាច់មួយចំនួន ដែលជាអំណោយដ៏ថ្លៃថ្លារបស់រាជរដ្ឋាភិបាល ចែកជូនតំណាងអង្គការសង្គមស៊ីវិលផងដែរ៕ អត្ថបទ៖ រ៉ាឌី
ស្ថានីយទូរទស្សន៍ បី ធី វី (BTV News) ទីតាំងភូមិឬស្សីស្រស់ សង្កាត់និរោធ ខណ្ឌច្បារអំពៅ រាជធានីភ្នំពេញ ព្រះរាជាណាចក្រកម្ពុជា ។
ទូរស័ព្ទ:(+855)61 999 877
