បញ្ហាអាកាសធាតុធ្ងន់ធ្ងរបានរំខានដល់ការធ្វើដំណើរកម្សាន្តកាលពីថ្ងៃសៅរ៍ (២៨ ធ្នូ) នៅទូទាំងសហរដ្ឋអាមេរិក ជាមួយនឹងព្យុះសង្ឃរាដ៏កាចសាហាវនៅភាគអាគ្នេយ៍ និងព្រិលធ្លាក់ខ្លាំង ព្រមទាំងខ្យល់កន្រ្តាក់បក់បោកនៅឆ្នេរសមុទ្រភាគខាងលិច ដោយពន្យារពេល ឬលុបចោលជើងហោះហើររាប់ពាន់នៅទូទាំងប្រទេស។

យោងតាមគេហទំព័រតាមដានជើងហោះហើរ FlightAware បានឱ្យដឹងថា ជើងហោះហើរជាង ៧.០០០ជើង នៅសហរដ្ឋអាមេរិក ត្រូវពន្យារពេលកាលពីថ្ងៃសៅរ៍ ហើយជាង ២០០ជើង ត្រូវបានលុបចោល។

សេវាអាកាសធាតុជាតិ និងសមត្ថកិច្ចក្នុងតំបន់និយាយថា យ៉ាងហោចណាស់មានខ្យល់ព្យុះសង្ឃរាចំនួន ១០ បានបោកបក់នៅភាគអាគ្នេយ៍នៃរដ្ឋ Texas រដ្ឋ Louisiana និង Mississippi របស់សហរដ្ឋអាមេរិក កាលពីថ្ងៃសៅរ៍ ដែលបណ្តាលឱ្យមនុស្សម្នាក់ស្លាប់នៅជិតទីក្រុង Houston។

ក្រុមមន្ត្រី និយាយថា លំនៅឋាន និងសាលារៀនជាច្រើនត្រូវបានរងការខូចខាត ឬបំផ្លាញយ៉ាងធ្ងន់ធ្ងរ។ រូបភាពនៅលើប្រព័ន្ធផ្សព្វផ្សាយសង្គមបង្ហាញពីផ្ទះសម្បែងបាក់បែកខ្ទេចខ្ទី ហើយដើមឈើ និងបង្គោលភ្លើង បានដួលរលំរាយប៉ាយពាសពេញផ្លូវ និងសួនមុខផ្ទះអ្នកស្រុក៕