យោធាអ៊ីរបស់អ៊ីស្រាអែល បាននិយាយថា កងកម្លាំងបានសម្លាប់ក្រុមសកម្មប្រយុទ្ធហាម៉ាស ប្រហែល ២០នាក់ក្នុងការវាយឆ្មក់លើមន្ទីរពេទ្យភាគខាងជើងតំបន់ហ្កាហ្សា ដោយបានចាត់ទុកថា ជា «ប្រតិបត្តិការធំបំផុតមួយ» ធ្វើឡើងនៅក្នុងដែនដីនេះ។

ការវាយលុកលើមន្ទីរពេទ្យ Kamal Adwan នៅតំបន់ Beit Lahia ភាគខាងជើងតំបន់ហ្កាហ្សា បានចាប់ផ្តើម ដែលអង្គការសុខភាពពិភពលោក (WHO) បាននិយាយថា វាបានបន្សល់ទុកអគារថែទាំសុខភាពដ៏សំខាន់ចុងក្រោយនៅតំបន់នេះ គ្មានអ្នកជំងឺ និងគ្មានបុគ្គលិក។

យោធាបាននិយាយនៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃអាទិត្យថា «ក្នុងអំឡុងពេលប្រតិបត្តិការ ភេរវករប្រហែល២០នាក់ត្រូវបានសម្លាប់ ហើយឧបករណ៍បំផ្ទុះដ៏មានឥទ្ធិពលដែលត្រូវបានដាក់ដោយក្រុមភេរវករ ត្រូវបានបំផ្លាញ ឬដោះ»។

ការវាយឆ្មក់បានបញ្ចប់ ក្រោយមកយោធាបាននិយាយថា យោធាបានចាប់ខ្លួនភេរវករចំនួន ២៤០ នាក់ មកពីក្រុមហាម៉ាស់ និងក្រុមសកម្មប្រយុទ្ធជីហាតអ៊ីស្លាម។

យោធា ក៏បាននិយាយផងដែរថាបានឃាត់ខ្លួននាយកមន្ទីរពេទ្យ លោក Hossam Abu Safiyeh ដែលត្រូវបានសង្ស័យថាជាក្រុមសកម្មប្រយុទ្ធហាម៉ាស។

យោធានិយាយថា ក្នុងចំណោមអ្នកដែលត្រូវបានឃុំខ្លួន យោធាបានកំណត់អត្តសញ្ញាណជនសកម្មប្រយុទ្ធចំនួន ១៥ នាក់ ដែលបានចូលរួមក្នុងការវាយប្រហាររបស់ក្រុមហាម៉ាស កាលពីថ្ងៃទី ៧ ខែតុលា ឆ្នាំ ២០២៣ លើអ៊ីស្រាអែល។