នៅថ្ងៃចន្ទនេះ នគរបាលនៅក្នុងរដ្ឋធានី Nairobi ប្រទេសកេនយ៉ា បានបាញ់ឧស្ម័នបង្ហូរទឹកភ្នែក ដើម្បីបំបែកក្រុមបាតុករដែលនាំគ្នាតវ៉ាប្រឆាំងនឹងអ្វីដែលពួកគេនិយាយថា គឺជារលកនៃការចាប់ពង្រាត់មិនអាចពន្យល់បាននូវក្រុមអ្នករិះគន់រដ្ឋាភិបាល ។

យោងតាមក្រុមសិទ្ធិមនុស្សដែលបានដាក់ការស្តីបន្ទោសការចាប់ខ្លួនក្រៅប្រព័ន្ធតុលាការលើនគរបាល និងក្រុមសេវាកម្មចារកម្មកេនយ៉ានោះ បានឲ្យដឹងថា ពលរដ្ឋកេនយ៉ារាប់សិបនាក់ ត្រូវបានចាប់ពង្រាត់ក្នុងរយៈពេលប៉ុន្មានខែកន្លងមកនេះ ។

ក្រុមអាជ្ញាធរកេនយ៉ា និយាយថា រដ្ឋាភិបាលពុំបានចូលរួមការចាប់ពង្រាត់ ឬការសម្លាប់ក្រៅប្រព័ន្ធតុលាការនោះទេ ។

រូបភាពវីដេអូឃ្លីបនៅលើកញ្ចក់ទូរទស្សន៍ NTV ឃើញក្រុមបាតុករក្មេងៗ ដង្ហែរក្បួននៅតាមទីប្រជុំជនក្នុងទីក្រុង Nairobi ខណៈបាតុករផ្សេងទៀត នាំគ្នាអង្គុយ និងស្រែកពាក្យស្លោកប្រឆាំងរដ្ឋាភិបាល និងកាន់បដាថ្កោលទោសការឃាត់ខ្លួនខុសច្បាប់ ។

អ្នកនាំពាក្យនគរបាលជាតិ ពុំបានឆ្លើយតបភ្លាមៗនោះទេ ចំពោះសំណើសុំសេចក្តីអត្ថាធិប្បាយជុំវិញបាតុកម្មនៅថ្ងៃចន្ទនេះ ។

ការចាប់ពង្រាត់ចោទប្រកាន់ នាំឲ្យមានបាតុកម្មប្រឆាំងរដ្ឋាភិបាលជាបន្តបន្ទាប់ ដែលបានចាប់ផ្តើមឡើងកាលពីខែមិថុនា ឆ្នាំនេះ ៕