សហរដ្ឋអាមេរិក កាលពីថ្ងៃចន្ទ (៣០ ធ្នូ) បានប្រកាសជំនួយផ្នែកយោធា និងថវិកាបន្ថែមចំនួន ៥,៩ពាន់លានដុល្លារ សម្រាប់អ៊ុយក្រែន ខណៈលោកប្រធានាធិបតី Joe Biden ប្រើប្រាស់សប្តាហ៍ចុងក្រោយរបស់ខ្លួននៅក្នុងតំណែងដើម្បីបង្កើនជំនួយដល់ទីក្រុងគីវ មុនពេលប្រធានាធិបតីជាប់ឆ្នោត លោក Donald Trump ឡើងកាន់អំណាច។

លោក Biden បានប្រកាសផ្តល់ជំនួយផ្នែកសន្តិសុខបន្ថែមចំនួន ២,៥ ពាន់លានដុល្លារ ហើយរដ្ឋមន្ត្រីក្រសួងរតនាគារ លោកស្រី Janet Yellen ប្រកាសផ្តល់ជំនួយថវិកាបន្ថែមចំនួន ៣,៤ពាន់លានដុល្លារ ដល់អ៊ុយក្រែន ដោយផ្តល់ឱ្យប្រទេសហែកហួរដោយសង្រ្គាមមួយនេះ នូវធនធានសំខាន់ៗស្របពេលមានការវាយប្រហារកាន់តែខ្លាំងពីរុស្ស៊ី លើជនស៊ីវិល និងហេដ្ឋារចនាសម្ព័ន្ធអ៊ុយក្រែន។

សភាសហរដ្ឋអាមេរិក បានអនុម័តជំនួយសរុបចំនួន ១៧៥ពាន់លានដុល្លារ សម្រាប់អ៊ុយក្រែន ចាប់តាំងពីប្រតិបត្តិការយោធាពិសេសរបស់រុស្ស៊ី លើអ៊ុយក្រែន ជិត ៣ឆ្នាំមុនមក នេះបើយោងតាមគណៈកម្មាធិការមិនចំណុះបក្សសម្រាប់ថវិកាសហព័ន្ធ។

ជិត ៣ឆ្នាំក្នុងសង្រ្គាម ទីក្រុងវ៉ាស៊ីនតោន បានសន្យាផ្តល់ជំនួយរាប់ពាន់លានដុល្លារសម្រាប់អ៊ុយក្រែន ប៉ុន្តែគេមិនប្រាកដទេថា តើជំនួយនឹងបន្តក្នុងល្បឿនដ៏លឿននោះទៀតឬទេក្រោមការដឹកនាំរបស់លោក Trump ដែលស្នងតំណែងលោក Biden នៅថ្ងៃទី២០ ខែមករា។ លោក Trump និយាយថា លោកចង់ឱ្យសង្រ្គាមបញ្ចប់ឆាប់រហ័ស ហើយតែងរិះគន់ជំនួយយោធានានា៕