រដូវត្រជាក់ និងភ្លៀងធ្លាក់ខ្លាំងពាសពេញតំបន់ហ្កហ្សាស្រ្ទីប ក្នុងរយៈពេលប៉ុន្មានថ្ងៃមកនេះ បានធ្វើឱ្យជីវិតរបស់អ្នកស្រុកដែលភៀសខ្លួនដោយសារសង្រ្គាមដ៏ឃោរឃៅ ជួបទុក្ខលំបាកកាន់តែខ្លាំងឡើង ស្របពេលឪពុកម្ដាយជាច្រើន ស្រក់ទឹកភ្នែកយ៉ាងសោកសៅនៅពេលដឹងថាកូនដែលទើបនឹងកើតរបស់ពួកគេ បានស្លាប់ដោយសារអាកាសធាតុត្រជាក់ខ្លាំងពេក។

ទារកអាយុមួយខែម្នាក់ បានស្លាប់ដោយសារការថយចុះកម្តៅក្នុងខ្លួន ហើយនេះជាករណីទី៦ ហើយដែលទារកទើបនឹងកើតបានស្លាប់ដោយសារត្រជាក់ខ្លាំងក្នុងពេលប៉ុន្មានថ្ងៃថ្មីៗនេះនៅតំបន់ហ្កាហ្សា នេះបើយោងតាមក្រុមវេជ្ជបណ្ឌិត។

ក្នុងរដូវរងាទីពីរនៃសង្រ្គាមហ្កាហ្សា អាកាសធាតុធ្ងន់ធ្ងរ និងជំនន់ទឹកភ្លៀងបានបន្ថែមភាពឈឺចាប់បន្ថែមទៀតដល់មនុស្សរាប់សែននាក់ដែលបានភៀសខ្លួនក្រោមការទម្លាក់គ្រាប់បែករួចហើយ ខណៈកិច្ចខិតខំប្រឹងប្រែងដើម្បីយល់ព្រមបទឈប់បាញ់ ហាក់ពុំមានផ្លែផ្កាអ្វីធំដុំ។

ការស្លាប់របស់ទារកទាំងនេះ បង្ហាញពីស្ថានភាពធ្ងន់ធ្ងរដែលក្រុមគ្រួសារងាយរងគ្រោះប៉ាឡេស្ទីន ត្រូវប្រឈមមុខ។ អាជ្ញាធរអ៊ីស្រាអែល និយាយថា ពួកគេអនុញ្ញាតឱ្យរថយន្តជំនួយរាប់ពាន់គ្រឿងដឹកស្បៀងអាហារ ទឹក បរិក្ខារពេទ្យ និងការផ្គត់ផ្គង់ទីជម្រកចូលទៅហ្កាហ្សា ប៉ុន្តែទីភ្នាក់ងារជំនួយអន្តរជាតិ និយាយថា កងកម្លាំងអ៊ីស្រាអែលបាននឹងកំពុងរារាំងការបញ្ជូនជំនួយ ដែលធ្វើឱ្យវិបត្តិមនុស្សធម៌កាន់តែអាក្រក់ទៅៗ៕