កាលពីឆ្នាំមុន អ្នកឃ្លាំមើលភាពអត់ឃ្លានឈានមុខគេរបស់ពិភពលោក បានព្រមាន ៥ដងរួចមកហើយថា តំបន់ហ្កាហ្សា អាចកំពុងធ្លាក់ទៅលើមាត់ជ្រោះនៃគ្រោះទុរ្ភិក្ស ប៉ុន្តែគ្រប់ពេលទាំងអស់ អ្នកឃ្លាំមើល មិនបានសម្រេចសន្និដ្ឋានជាក់លាក់ថា ទុរ្ភិក្សកំពុងកើតមាននៅតំបន់ហែកហួរដោយសង្រ្គាមនោះទេ។

បុគ្គលិកជំនួយ និងវេជ្ជបណ្ឌិតជាច្រើននិយាយថា ទុរ្ភិក្សបានកើតឡើងរួចទៅហើយនៅហ្កាហ្សា ប៉ុន្តែស្របពេលមានការវាយលុកយោធារបស់អ៊ីស្រាអែល និងការរារាំងមិនឱ្យធ្វើដំណើរ ក្រុមឃ្លាំមើលភាពអត់ឃ្លានរបស់ពិភពលោក IPC មិនអាចយកទិន្នន័យសំខាន់ៗដើម្បីកំណត់ថាតើស្ថានភាពនោះបង្កើតបានជាទុរ្ភិក្ស ឬក៏អត់នោះទេ។

របាយការណ៍ IPC ប្រើមាត្រដ្ឋានពីលេខ១ ដល់លេខ៥ ដើម្បីចាត់ថ្នាក់តំបន់នានាថាមានអសន្តិសុខស្បៀងធ្ងន់ធ្ងរ ដោយរំកិលតាមលេខរៀងពី តិចតួចបំផុត ធ្ងន់ធ្ងរ វិបត្តិ គ្រាអាសន្ន ទៅដល់ទុរ្ភិក្ស។ ដែនដីហ្កាហ្សា បានខិតជិតលេខ៥ ជាប់ជាប្រចាំ ប៉ុន្តែមិនដែលឈានដល់កម្រិតទុរ្ភិក្សទេ ផ្អែកតាមទិន្នន័យដែលមិនគ្រប់គ្រាន់។

អ្នកជំនាញខ្លះចង់ឱ្យ IPC បន្ថយកម្រិតរបស់ខ្លួនសម្រាប់ការកំណត់ទុរ្ភិក្ស នៅក្នុងតំបន់ដែលមានជម្លោះ និងពង្រីកប្រភេទទិន្នន័យដែលខ្លួនបានប្រើ។ ថ្មីៗនេះ គណៈកម្មាធិការត្រួតពិនិត្យគ្រោះទុរ្ភិក្សរបស់ IPC បានព្រមានថា គ្រោះទុរ្ភិក្ស នឹងកើតមានជៀសមិនផុតនៅក្នុងតំបន់ភាគខាងជើងហ្កាហ្សា៕