ប្រធានាធិបតីអ៊ុយក្រែន លោក Volodymyr Zelenskiy បាននិយាយកាលពីយប់ថ្ងៃអង្គារ (៣១ ធ្នូ) ថា សន្តិភាពសម្រាប់អ៊ុយក្រែន ជាកិច្ចខិតខំប្រឹងប្រែងដ៏លំបាក ប៉ុន្តែលោកជឿថា សហរដ្ឋអាមេរិកនឹងឈរជាមួយទីក្រុងគីវ នៅពេលដែលខ្លួនបន្តប្រយុទ្ធដើម្បីបញ្ឈប់ប្រតិបត្តិការយោធារបស់រុស្ស៊ី ក្នុងសង្រ្គាមរយៈពេល ៣៤ខែមកនេះ។

លោក Zelenskiy នៅក្នុងវីដេអូ ២១នាទី ស្វាគមន៍ឆ្នាំថ្មីដល់ជនរួមជាតិ បានលើកឡើងថា មានតែអ៊ុយក្រែនដ៏រឹងមាំប៉ុណ្ណោះដែលអាចទទួលបានសន្តិភាព និងទទួលបានការគោរពទូទាំងពិភពលោក។

រដ្ឋបាលរបស់លោកប្រធានាធិបតីអាមេរិក Joe Biden បានផ្តល់ការគាំទ្រផ្នែកយោធាច្រើនបំផុតសម្រាប់អ៊ុយក្រែន ក្នុងចំណោមប្រទេសលោកខាងលិច ចាប់តាំងពីការវាយលុកទ្រង់ទ្រាយធំនៅខែកុម្ភៈ ឆ្នាំ២០២២ មក។

អ៊ុយក្រែន បារម្ភចំពោះការរិះគន់របស់ប្រធានាធិបតីជាប់ឆ្នោតអាមេរិក លោក Donald Trump អំពីជំនួយដល់ទីក្រុងគីវ និងការសន្យាក្នុងអំឡុងពេលយុទ្ធនាការបោះឆ្នោតអាមេរិក ក្នុងការបញ្ចប់សង្រ្គាមយ៉ាងឆាប់រហ័ស ប៉ុន្តែលោក Zelenskiy បានសម្តែងសុទិដ្ឋិនិយមអំពីការធានាបន្តគាំទ្ររបស់សហរដ្ឋអាមេរិក៕