អ្នកនាំពាក្យរបស់ក្រុមហ៊ួទីរបស់ប្រទេសយេម៉ែន លោក Mohammed Abdulsalam បាននិយាយថា ប្រទេសនេះ នឹងបន្តការពារខ្លួន បន្ទាប់ពីមានការវាយប្រហាររបស់សហរដ្ឋអាមេរិកជាច្រើនលើក លើគោលដៅ ក្នុងរដ្ឋធានីសាណា (Sanaa) កាលពីថ្ងៃអង្គារ (ទី៣១ ខែធ្នូ ឆ្នាំ២០២៤)។

យោធាអាមេរិក បានប្រាប់ឲ្យដឹងថា ខ្លួនបានបើកការវាយប្រហារលើគោលដៅរបស់ជាច្រើនរបស់ក្រុមហ៊ួទីនៅទីក្រុង Sanaa និងទីតាំងតំបន់ឆ្នេរ ក្នុងប្រទេសយេម៉ែន កាលពីថ្ងៃចន្ទ និងថ្ងៃអង្គារ។

តាមរយៈការបង្ហោះ នៅលើបណ្ដាញសង្គម X ទីបញ្ជាកណ្ដាលរបស់យោធាអាមេរិក បានឲ្យដឹងថា៖ «នៅថ្ងៃទី៣០ និងទី៣១ ខែធ្នូ ឆ្នាំ២០២៤ នាវា និងយន្តហោះរបស់កងទ័ពជើងទឹកសហរដ្ឋអាមេរិក បានកំណត់គោលដៅវាយប្រហារលើទីបញ្ជាការ និងទីតាំងគ្រប់គ្រងរបស់ក្រុមហ៊ួទី ព្រមទាំងកន្លែងផលិត និងផ្ទុកអាវុធទូទៅកម្រិតខ្ពស់ (ACW) ដែលរួមមានមីស៊ីល និងយនដ្រូន (UAV)»។

គួរបញ្ជាក់ថា ក្រុមសកម្មប្រយុទ្ធគាំទ្រដោយអ៊ីរ៉ង់មួយនេះ បាន និងកំពុងវាយប្រហារលើការដឹកជញ្ជូនពាណិជ្ជកម្ម នៅសមុទ្រក្រហមអស់រយៈពេលជាង ១ឆ្នាំមកហើយ ដើម្បីព្យាយាមធ្វើប្រតិបត្តិការរារាំងនាវា ដែលមានទំនាក់ទំនងជាមួយអ៊ីស្រាអែល ដោយនិយាយថា ពួកគេកំពុងធ្វើសកម្មភាព ដើម្បីបង្ហាញសាមគ្គីភាពជាមួយប៉ាឡេស្ទីន អំឡុងសង្គ្រាមរយៈពេល ១ឆ្នាំរបស់អ៊ីស្រាអែល នៅតំបន់ហ្កហ្សា៕