ភ្នំពេញ ៖ រដ្ឋមន្រ្តីក្រសួងអប់រំ នៅថ្ងៃទី៣ខែវិច្ឆិកាឆ្នាំ២០២១នេះ បានប្រកាសថា នឹងពិនិត្យលើកពេលប្រឡងសញ្ញាប័ត្រមធ្យមសិក្សាទុតិយភូមិថ្នាក់ទី១២ ទៅដើមឆ្នាំ២០២២វិញ។ ការសម្រេចពិចារណាលើកពេលប្រឡងនេះ គឺដើម្បីអោយសិស្សអាចត្រៀមខ្លួនបានកាន់តែច្រើន។

ក្នុងឱកាសចុះ ចុះពិនិត្យទស្សនកិច្ច និងសម្ពោធវិទ្យាស្ថានស្រាវជ្រាវសេដ្ឋកិច្ចអាស៊ាន នៃសាកលវិទ្យាល័យជាតិគ្រប់គ្រង នាថ្ងៃនេះ ឯកឧត្តម ហង់ ជួនណារ៉ុន រដ្ឋមន្រ្តីក្រសួងអប់រំ បានបញ្ជាក់ថា ការប្រឡងសញ្ញាបត្របាក់ឌុប គឺត្រូវតែប្រឡងសម្រាប់ឆ្នាំនេះ មិនមានការជាប់ដោយស្វ័យប្រវត្តដូចឆ្នាំមុននោះទេ។

សម្រាប់ការប្រឡងខាងមុខនេះ ក្រសួងអប់រំក៏បានពិចារណាផ្លាស់ប្ដូរកាលបរិច្ឆេទ និងពន្យា​ពេល​ប្រឡងទៅដើមឆ្នាំ២០២២វិញ ដើម្បីអោយសិស្សអាចមានពេលវេលាគ្រប់គ្រាន់​សម្រាប់​ត្រៀម​ការប្រឡងផងដែរ។ ឯកឧត្តមបញ្ជាក់ថា ខណៈពេលនេះ សិស្សគឺត្រូវខិតខំរៀនជាចាំបាច់។

ជុំវិញការប្រឡងនេះ ដំបូងឡើយក្រសួងអប់រំ កំណត់ សម័យប្រឡងបាក់ឌុបថ្នាក់ជាតិចាស់ គឺ០៦ធ្នូ ២០២១ ៖ ដោយប្រធានមន្ទីរអប់រំ យុវជន និងកីឡា ត្រូវធ្វើសំណើរមណ្ឌលប្រឡងបាក់ឌុបជូន​រដ្ឋ​មន្ត្រីក្រសួងអប់រំ យុវជន និងកីឡា ដើម្បីពិនិត្យនិងសម្រេចតាមឋានានុក្រម។

ក្រសួងក៏ធ្លាប់បានបញ្ជាក់ថា ការប្រឡងបាក់ឌុប ត្រូវបន្តអនុវត្តន៍គោលការណ៍ច្បាប់ យុត្តិធម៌ តម្លាភាព និងលទ្ធផលទទួលយកបាន ស្របនឹងវិធានការសុវត្ថិភាពសុខភាព។

ជុំវិញវិស័យអប់រំនៅកម្ពុជា សម្រាប់សិស្សថ្នាក់ទី ៩និងទី១២ មួយចំនួន បានចូលសិក្សាជាថ្មី​នៅ​កំឡុងខែ កញ្ញាកន្លងទៅ។ ចំពោះការបើកដំណើរការសិក្សាគ្រប់កម្រិតសិក្សាទូទាំងរាជធានី-ខេត្ត ទើបតែបានចាប់ផ្ដើមអនុញ្ញាត ​នៅថ្ងៃទី ១វិច្ឆិកាឆ្នាំ ២០២១នេះប៉ុណ្ណោះ ស្របពេលដែល​រាជរដ្ឋាភិបាល​ប្រកាសបើកប្រទេសគ្រប់វិស័យឡើងវិញនៅថ្ងៃតែមួយ។

ការសម្រេចបើកសាលារៀនឡើងវិញ ​ក៏ដូចជាបើកប្រទេសឡើងវិញនេះ ក៏ដោយសារតែកម្ពុជា​សម្រេច​បានជោគជ័យលើការចាក់វ៉ាក់សាំងបង្ការកូវីដ-១៩​ និងអាចគ្រប់គ្រងលើករណីឆ្លង។

គិតត្រឹមថ្ងៃនេះ ​ក៏នៅមានសាលារៀនប្រមាណ ២០០ទៅ ៣០០ សាលាដែលពុំទាន់បាន​បើក​ដំណើរការ​ ដោយសារទីតាំងសាលាត្រូវ​បានប្រើប្រាស់ជាមណ្ឌលចត្តាឡីស័ក និង​កន្លែងព្យាបាលកូវីដ-១៩៕

អត្ថបទ ៖ គឹមហុក