ដោយប្រកាន់ខ្ជាប់នូវការអនុវត្តដ៏យូរអង្វែងដែលមានរយៈពេលជាងបីទសវត្សរ៍ ឥណ្ឌា និងប៉ាគីស្ថាន បានផ្លាស់ប្តូរបញ្ជីនៃមូលដ្ឋាននុយក្លេអ៊ែររបស់ពួកគេ កាលពីថ្ងៃពុធ ក្រោមកិច្ចព្រមព្រៀងទ្វេភាគី ដែលហាមឃាត់ការវាយប្រហារលើទីតាំងបរមាណូគ្នាទៅវិញទៅមក។

យោងតាមសេចក្តីថ្លែងការណ៍របស់ក្រសួងការបរទេសប៉ាគីស្ថានបានឲ្យដឹង ប្រទេសជិតខាងប្រដាប់ដោយនុយក្លេអ៊ែរអាស៊ីខាងត្បូងទាំងពីរ បានផ្លាស់ប្តូរបញ្ជីនៃទីតាំងនិងសម្ភារៈបរិក្ខារនុយក្លេអ៊ែរ ទៅវិញទៅមក។

ការផ្លាស់ប្តូរនេះ បានកើតឡើងដោយអនុលោមតាមកិច្ចព្រមព្រៀងស្តីពីការហាមឃាត់ការវាយប្រហារប្រឆាំងនឹងទីតាំងនុយក្លេអ៊ែរ និងសម្ភារៈបរិក្ខារនុយក្លេអ៊ែររវាងប៉ាគីស្ថាន និងឥណ្ឌា។ ដោយត្រូវបានចុះហត្ថលេខា នៅថ្ងៃទី ៣១ ខែធ្នូ ឆ្នាំ ១៩៨៨ កិច្ចព្រមព្រៀងនេះ ចែងថា ប្រទេសទាំងពីរ ត្រូវតែជូនដំណឹងគ្នាទៅវិញទៅមកអំពីទីតាំងនុយក្លេអ៊ែរ និងគ្រឿងបរិក្ខារ ដែលស្ថិតនៅក្រោមការត្រួតពិនិត្យរបស់ខ្លួន នៅ ថ្ងៃទី ០១ ខែមករា រៀងរាល់ឆ្នាំ។

កិច្ចព្រមព្រៀងនេះ កំណត់ឲ្យប្រទេសទាំងពីរជូនដំណឹងគ្នាទៅវិញទៅមកអំពីមូលដ្ឋាននុយក្លេអ៊ែរ និងគ្រឿងបរិក្ខារ ដែលត្រូវបានការពារ នៅក្រោមកិច្ចព្រមព្រៀង នៅថ្ងៃទី០១ នៃខែមករា ជារៀងរាល់ឆ្នាំ។