ភ្នំពេញ៖ ឯកឧត្តមកិត្តិសង្គហបណ្ឌិត គន់ គីម អនុប្រធានទី១ គណៈកម្មាធិការជាតិគ្រប់គ្រងគ្រោះមហន្តរាត បានអញ្ជើញបើកកិច្ចប្រជុំស្តីពីលទ្ធផលការងារគ្រប់គ្រងគ្រោះមហន្តរាយ ឆ្នាំ២០២៤ និងទិសដៅ នាព្រឹកថ្ងៃទី២ ខែមករាឆ្នាំ២០២៥ ដោយមានការចូលរួមពីឯកឧត្តម អនុប្រធាន ទីប្រឹក្សា ជំនួយការ អគ្គលេខាធិការរង និងប្រធាននាយកដ្ឋានទាំង៥ (គ.ជ.គ.ម)។

នាឱកាសនោះ ឯកឧត្តម ទេសរដ្ឋមន្រ្តី គន់ គីម មានប្រសាសន៍ លើកទិសដៅអនុវត្តឆ្នាំ២០២៥ ដោយនឹងបន្តសកម្មភាព និងតាមដានការអនុវត្តន៍ការងារតាមផែនការសកម្មភាពជាតិ សម្រាប់កាកាត់បន្ថយហានិភ័យគ្រោះមហន្តរាយ២០២៤-២០២៨ ។

ឯកឧត្តម ទេសរដ្ឋមន្រ្តី គន់ គីម មានប្រសាសន៍ លើកកម្ពស់ភាពជាដៃគូ និងសហការជាមួយវិស័យឯកជន និងផ្នែកសាធារណៈសម្រាប់ការស្រាវជ្រាវ អភិវឌ្ឍន៍ និងសកម្មភាពនៃការអនុវត្តវិទ្យាសាស្ត្រ បច្ចេកទេស ក្នុងការកាត់បន្ថយគ្រោះមហន្តរាយគ្រប់ប្រភេទ។ 

ជាមួយគ្នា ឯកឧត្តម ទេសរដ្ឋមន្រ្តី គន់ គីម ថ្លែងថា គណៈកម្មាធិការជាតិគ្រប់គ្រងគ្រោះមហន្តរាយចូលរួមសហការ និងគាំទ្រការរៀបចំផែនការ និងការកៀរគរធនធានសម្រាប់ការបន្តអនុវត្តផែនការកាត់បន្ថយហានិភ័យគ្រោះមហន្តរាយនៅគ្រប់ក្រសួងស្ថាប័នពាក់ព័ន្ធ និងសកម្មភាពក្នុងការកាត់បន្ថយហានិភ័យ គ្រោះមហន្តរាយ ស្របតាមក្របខណ្ឌការងារសេនដាយ ២០១៥-២០៣០ ។

ឯកឧត្តម ទេសរដ្ឋមន្ត្រី គន់ គីម បានបន្តថា ដើមឆ្នាំ២០២៥នេះ គ.ជ.គ.ម.បន្តពង្រឹងសកម្មភាព ចំណេះដឹងនិងការយល់ដឹង អំពីហានិភ័យគ្រោះមហន្តរាយជូនដល់មន្ត្រីជំនាញ នៅថ្នាក់ ជាតិ ដើម្បីគាំទ្រការបណ្តុះបណ្តាលបន្តដល់មន្ត្រីជំនាញ ថ្នាក់ក្រោមជាតិ និងមន្ត្រីជំនាញ នៃអង្គការដៃគូ សម្រាប់ កិច្ចសហការ និងធ្វើសកម្មភាព នៅតាមមុខសញ្ញារងគ្រោះនិងងាយរងគ្រោះ ក្នុងសហគមន៍ ។

បន្ថែមលើសពីនេះ ឯកឧត្តម ទេសរដ្ឋមន្ត្រី គន់ គីម ណែនាំបន្តពង្រឹងយន្តការផែនការផ្សព្វផ្សាយ និងចែករំលែកព័ត៌មានហានិភ័យគ្រោះមហន្តរាយពហុមុខសញ្ញាគ្រោះ ថ្នាក់ ដល់ក្រសួងស្ថាប័នពាក់ព័ន្ធ ដៃគូអភិវឌ្ឍន៍ វិស័យឯកជន និងសាធារណជន ដើម្បីប្រើប្រាស់ជាប្រយោជន៍ ក្នុងការរៀបចំផែនការ និងធ្វើការសម្រេចចិត្ត ដើម្បីអាចទប់ស្កាត់និងកាត់បន្ថយបាននូវកម្រិតហានិភ័យដែលអាចនឹងកើតមានជាយថាហេតុ ។