រដ្ឋមន្ត្រីក្រសួងព័ត៌មានរបស់ប្រទេសស៊ីរី នៅក្នុងរដ្ឋាភិបាលអន្តរកាលរបស់ប្រទេសNEh បានប្រាប់សារព័ត៌មាន AFP ថា លោកកំពុងធ្វើការឆ្ពោះទៅរកសារព័ត៌មានសេរី និងប្តេជ្ញាចិត្តចំពោះ «សេរីភាពនៃការបញ្ចេញមតិ» បន្ទាប់ពីការគ្រប់គ្រងយ៉ាងតឹងរ៉ឹងជាច្រើនទសវត្សរ៍ ក្រោមការគ្រប់គ្រងរបស់អតីតមេដឹកនាំរបស់ប្រទេសនេះ។

រដ្ឋមន្ត្រី Mohamed Al-Omar បាននិយាយថា៖«យើងកំពុងធ្វើការ ដើម្បីបង្រួបបង្រួមសេរីភាពសារព័ត៌មាន និងការបញ្ចេញមតិ ដែលត្រូវបានរឹតត្បិតយ៉ាងធ្ងន់ធ្ងរ» នៅក្នុងតំបន់ដែលគ្រប់គ្រងដោយអតីតរដ្ឋាភិបាល លោកបាសា អាល់អាសាដ ( Bashar al-Assad) បន្ទាប់ពីក្រុមឧទ្ទាមដឹកនាំដោយឥស្លាមកាលពីថ្ងៃទី ០៨ ខែធ្នូ បានបញ្ចប់ការគ្រប់គ្រងរយៈពេលជាង ៥ទសវត្សរ៍ដោយក្រុមគ្រួសាររបស់លោក អាសាដ។

គណបក្ស Baath ដែលកំពុងកាន់អំណាចរបស់ប្រទេសស៊ីរី និងវង្សត្រកូលរបស់លោក អាសាដ បានកាត់បន្ថយយ៉ាងខ្លាំងនូវគ្រប់ទិដ្ឋភាពនៃជីវិតប្រចាំថ្ងៃ រួមទាំងសេរីភាពសារព័ត៌មាន និងការបញ្ចេញមតិជាមួយនឹងប្រព័ន្ធផ្សព្វផ្សាយ ដែលជាឧបករណ៍របស់អ្នកគ្រប់គ្រងអំណាច។

អង្គការអ្នកសារព័ត៌មានគ្មានព្រំដែន ដែលជាអង្គការឃ្លាំមើលសេរីភាពព័ត៌មាន បានដាក់ចំណាត់ថ្នាក់ប្រទេសស៊ីរីទី២ចុងក្រោយនៅលើសន្ទស្សន៍សេរីភាពសារព័ត៌មានពិភពលោកឆ្នាំ ២០២៤របស់ខ្លួន នាំមុខប្រទេសអេរីទ្រី និងនៅពីក្រោយប្រទេសអាហ្វហ្គានីស្ថាន ដែលគ្រប់គ្រងដោយក្រុមតាលីបង់។