គណៈប្រតិភូស៊ីរីដឹកនាំដោយរដ្ឋមន្រ្តីការបរទេសទើបទទួលបានការតែងតាំងថ្មីលោក Asaad Hassan al-Shibani បានធ្វើដំណើរទៅដល់ប្រទេសអារ៉ាប៊ីសាអូឌីត នៅក្នុងដំណើរទស្សនកិច្ចបរទេសផ្លូវការលើកដំបូងរបស់ពួកគេ ។

គណៈប្រតិភូនេះ រួមមានទាំងរដ្ឋមន្រ្តីការពារជាតិស៊ីរីលោក Murhaf Abu Qasra ។ ដំណើរទស្សនកិច្ចនេះដែរ បានកើតមានឡើងរយៈពេលតិចជាង ១ខែ ចាប់តាំងពីលោក Bashar al-Assad ត្រូវបានផ្តួលរំលំដោយក្រុមឧទ្ទាមកាលពីថ្ងៃទី ៨ ខែធ្នូ ។

ទីភ្នាក់ងារព័ត៌មាន SANA របស់ស៊ីរី បានរាយការណ៍ដោយលើកឡើងប្រភពមិនបញ្ចេញឈ្មោះពីក្រសួងការបរទេសស៊ីរីថា ដំណើរទស្សនកិច្ចរបស់ពួកគេ ត្រូវបានរៀបចំឡើងតាមការអញ្ជើញរបស់រដ្ឋមន្រ្តីការបរទេសអារ៉ាប៊ីសាអូឌីត គឺព្រះអង្គម្ចាស់ Faisal bin Farhan ។

នៅដើមសប្តាហ៍នេះ លោក Shaibani បានបញ្ជាក់ពីដំណើរទស្សនកិច្ចតាមការគ្រោងទុករបស់លោកទៅកាន់អារ៉ាប៊ីសាអូឌីត អំឡុងសន្និសីទសារព័ត៌មាននៅក្នុងទីក្រុងដាម៉ាស់ជាមួយរដ្ឋមន្រ្តីគុយវ៉ែតលោក Abdullah Al-Yahya ៕