ទីភ្នាក់ងារFBI បាននិយាយកាលពីថ្ងៃព្រហស្បតិ៍សប្ដាហ៍នេះថា ទាហានជើងចាស់ដែលបានបើករថយន្តម៉ាកភីកអាប់បំបុកហ្វូងមនុស្សយប់ថ្ងៃចូលឆ្នាំថ្មីនៅទីក្រុងនូ អលីន (New Orleans)សហរដ្ឋអាមេរិក បានធ្វើសកម្មភាពតែម្នាក់ឯង ដោយកែប្រែការសន្និដ្ឋានរបស់ខ្លួនកាលពីមួយថ្ងៃមុនដែលថាជនល្មើសប្រព្រឹត្តសកម្មភាពនេះជាមួយមនុស្សផ្សេងទៀត ក្នុងការវាយប្រហារដ៏សាហាវដែលក្រុមមន្ត្រីបាននិយាយថាត្រូវបានបំផុសគំនិត ឬជំរុញដោយក្រុមរដ្ឋអ៊ីស្លាមISIS។

FBI ក៏បានបង្ហាញផងដែរថា អ្នកបើកឈ្មោះ Shamsud-Din Jabbar ជាពលរដ្ឋអាមេរិកមកពីរដ្ឋតិចសាស់ បានបង្ហោះវីដេអូចំនួន៥ឃ្លីបនៅលើFacebook របស់គេ ប៉ុន្មានម៉ោងមុនការវាយប្រហារ ដែលរូបគេបានប្រកាសការគាំទ្រចំពោះក្រុមសកម្មប្រយុទ្ធខាងលើ និងបានរម្លឹកពីអំពើហិង្សា ដែលរូបគេនឹងប្រព្រឹត្តនៅសង្កាត់ French Quarter ដ៏ល្បីល្បាញ របស់រដ្ឋ ល្វីហ្ស៊ីណា។

លោក គ្រីស្តូហ្វើ រៃអា (Christopher Raia) ជំនួយការនាយករងនៃផ្នែកប្រឆាំងភេរវកម្មរបស់ទីភ្នាក់ងារ FBI បាននិយាយដោយហៅឈ្មោះជនល្មើស Jabbar ថា ជននេះ ត្រូវបានជំរុញទឹកចិត្តដោយក្រុមរដ្ឋអ៊ីស្លាម ISIS ១០០% ហើយថា នេះជាអំពើភេរវកម្ម។

ការវាយប្រហារនៅតាមបណ្តោយផ្លូវ ប៊បិន (Bourbon) បានសម្លាប់មនុស្ស ១៤ នាក់ និងជនល្មើស Jabbar អាយុ ៤២ ឆ្នាំ ដែលត្រូវបានបាញ់សម្លាប់នៅក្នុងការប្រយុទ្ធគ្នាជាមួយនគរបាល បន្ទាប់ពីបានបើករថយន្តយ៉ាងលឿននៅជុំវិញរបាំងនគរបាល ហើយបានបើកបំបុកចូលហ្វូងមនុស្ស និងបានបណ្ដាលឲ្យមនុស្សប្រហែល៣០ នាក់ផ្សេងទៀតបានរងរបួស៕