អាជ្ញាធរតំបន់ហ្កាហ្សា បាននិយាយថា ការវាយប្រហារតាមអាកាសរបស់អ៊ីស្រាអែល បានសម្លាប់ជនជាតិប៉ាឡេស្ទីនយ៉ាងហោចណាស់ ៦៨នាក់ នៅទូទាំងតំបន់ហ្កាហ្សាស្ទ្រីប កាលពីថ្ងៃព្រហស្បតិ៍ (០២ មករា) រួមទាំងនៅជំរំតង់មួយ ដែលប្រធានកងកម្លាំងនគរបាលនៃតំបន់ហ៊ុមព័ទ្ធ អនុប្រធាន និងជនភៀសខ្លួនជាច្រើនបានស្លាប់។

អ៊ីស្រាអែល និយាយថា អនុប្រធាននគរបាលរូបនោះជាប្រមុខកងកម្លាំងសន្តិសុខរបស់ក្រុមសកម្មប្រយុទ្ធប៉ាឡេស្ទីនហាម៉ាស នៅភាគខាងត្បូងតំបន់ហ្កាហ្សា។ ការវាយប្រហារនេះបានកើតឡើងនៅក្នុងស្រុក Al-Mawasi ដែលត្រូវបានកំណត់ថាជាតំបន់មនុស្សធម៌សម្រាប់ជនស៊ីវិលនៅដើមសង្គ្រាមរយៈពេល ១៤ខែរវាងអ៊ីស្រាអែល និងក្រុមហាម៉ាស ដែលគ្រប់គ្រងហ្កាហ្សា។

យោធាអ៊ីស្រាអែលបាននិយាយថា ខ្លួនបានធ្វើការវាយប្រហារផ្អែកលើព័ត៌មានចារកម្មនៅតំបន់ Al-Mawasi នៅភាគខាងលិចនៃទីក្រុង Khan Younis ហើយបានកម្ចាត់ប្រមុខរងនគរបាលហ្កាហ្សា ឈ្មោះ Hussam Shahwan ដោយនិយាយថាលោកបានដឹកនាំកងកម្លាំងហាម៉ាស នៅភាគខាងត្បូងហ្កាហ្សា។ យោធាមិនបាននិយាយអំពីការស្លាប់របស់អគ្គនាយកនៃនាយកដ្ឋាននគរបាលហ្កាហ្សា ឈ្មោះ Mahmoud Salah ទេ។

នៅពេលត្រូវសាកសួរពីតួលេខអ្នកស្លាប់ដ៏ខ្ពស់ដែលបានរាយការណ៍កាលពីថ្ងៃព្រហស្បតិ៍នោះ អ្នកនាំពាក្យយោធាអ៊ីស្រាអែល និយាយថា ខ្លួនអនុវត្តតាមច្បាប់អន្តរជាតិក្នុងការធ្វើសង្គ្រាមនៅតំបន់ហ្កាហ្សា ដោយចាត់វិធានការ "ប្រុងប្រយ័ត្នជាមុនដើម្បីកាត់បន្ថយគ្រោះថ្នាក់ដល់ជនស៊ីវិល"៕