មន្ត្រីយោធា និងក្នុងតំបន់ បានប្រាប់ឲ្យដឹងថា ប្រទេសរុស្ស៊ីបានបើកការបាញ់បង្ហោះយានដ្រូនយ៉ាងសន្ធាប់ នៅក្នុងការវាយប្រហារ នាពេលយប់ លើប្រទេសអ៊ុយក្រែន នៅថ្ងៃសុក្រ (ទី៣ ខែមករា) នេះ ដោយបានសម្លាប់ជនស៊ីវិលម្នាក់ និងរបួសបួននាក់ទៀត នៅក្នុងតំបន់គីវ។

កងកម្លាំងដែនអាកាស បានឲ្យដឹងថា កងកម្លាំងការពារដែនអាកាសអ៊ុយក្រែន បានបាញ់យានដ្រូនរុស្ស៊ីចំនួន ៦០គ្រឿង ក្នុងចំណោមយានដ្រូន ៩៣គ្រឿង ហើយក៏បានប្រាប់ទៀតថា យានដ្រូន ២៦គ្រឿង ត្រូវបានធ្វើឲ្យ «មានបញ្ហាបច្ចេកទេស» ដោយនិយាយយោងទៅលើការប្រើប្រាស់សង្រ្គាមអេឡិចត្រូនិករបស់អ៊ុយក្រែន ដើម្បីបង្វែរទិសដៅយានដ្រូនរបស់រុស្ស៊ី។ កងទ័ពអាកាសបានបន្ថែមថា យានដ្រូនរបស់រុស្សី ១គ្រឿង នៅតែហោះវិលវល់លើអាកាស។

អភិបាលស្តីទីរបស់តំបន់គីវ លោក Mykola Kalashnyk បាននិយាយថា អ្នកបើកបររថយន្តដឹកទំនិញ បានបាត់បង់ជីវិតដោយសារបំណែកយានដ្រូនធ្លាក់ចំ។ លោកបានបន្តថា បំណែកទាំងនោះក៏បានធ្វើឲ្យផ្ទះឯកជនមួយចំនួនរងការខូចខាតផងដែរ ដោយបណ្តាលឲ្យមនុស្សបួននាក់រងរបួស ក្នុងនោះមានទាំងក្មេងប្រុសអាយុ ១៦ឆ្នាំម្នាក់ផងដែរ។

កងទ័ពអាកាសបានបញ្ជាក់បន្ថែមថា យានដ្រូនរបស់រុស្ស៊ីបានកំណត់គោលដៅតំបន់អ៊ុយក្រែនចំនួន៩ នៅទូទាំងប្រទេស។ ហើយយោធាបានឲ្យដឹងថា លំនៅឋាន និងអគារពាណិជ្ជកម្ម បានរងការខូចខាត នៅក្នុងតំបន់ Donetsk នៅភាគខាងកើត និងតំបន់ Chernihiv នៅភាគខាងជើង៕