នៅថ្ងៃទី៥ ខែមករា ឆ្នាំ ២០២៥នេះ គឺជាខួប៤៩ឆ្នាំ នៃចំណងអាពាហ៍ពិពាហ៍​របស់​សម្ដេច​អគ្គ​មហា​សេនា​បតីតេជោ ហ៊ុន សែន ប្រធានព្រឹទ្ធសភាកម្ពុជា និងជាប្រធានគណបក្ស​ប្រជាជន​កម្ពុជា និងសម្ដេចកិត្តិកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

ក្នុងឱកាសខួប៤៩ឆ្នាំ នៃចំណងអាពាហ៍ពិពាហ៍នេះ សម្ដេចតេជោ ហ៊ុន សែន បានមាន​ប្រសាសន៍​យ៉ាង​ខ្លី​បញ្ជាក់ថា នៅថ្ងៃទី៥ ខែមករា ឆ្នាំ ២០២៥នេះ គឺជាខួប៤៩ឆ្នាំនៃថ្ងៃ អាពាហ៍​ពិពាហ៍​របស់សម្ដេច និងសម្ដេចកិត្តិព្រឹទ្ធបណ្ឌិត។ សម្ដេចតេជោ បានមានប្រសាសន៍ថា ដោយ​មិន​ចង់​សរសេរ​ឡើងវិញ សម្ដេចបានចាក់ផ្សាយនូវការអានប្រវត្តិរបស់សម្ដេច និង​សម្ដេច​កិត្តិ​ព្រឹទ្ធ​បណ្ឌិត​តាំង​ពីការចាប់ផ្ដើមនាឆ្នាំ ១៩៧៣ ដល់ឆ្នាំ ១៩៧៩។

ក្នុងឱកាសនេះ សម្ដេចតេជោបានមានប្រសាសន៍ថា ឆ្នាំ២០២៦ ខាងមុខ​នឹង​ឈាន​ដល់​ខួប​លើក​ទី៥០ឆ្នាំ នៃចំណងអាពាហ៍ពិពាហ៍របស់របស់សម្ដេច និងសម្ដេចកិត្តិព្រឹទ្ធបណ្ឌិត ដូច្នេះ​សម្ដេច​នឹង​ខិតខំ​សរសេរបន្ថែមនូវជីវិតគ្រួសារសម្ដេចពីឆ្នាំ១៩៧៩ ដល់ឆ្នាំ២០២៦ បន្ថែមទៀត ដែល​ផ្តោត​សំខាន់​លើកា​រកសាងគ្រួសារ ពិសេសលើការអប់រំកូននិងចៅ។

សូមជម្រាបថា នៅថ្ងៃទី៥ ខែមករា ឆ្នាំ២០២៥ នេះ គឺខួបអាពាហ៍ពិពាហ៍៤៩ឆ្នាំ របស់​សម្តេច​អគ្គ​មហា​សេនា​បតីតេជោ ហ៊ុន សែន និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន។ សម្តេចតេជោ​ និង​សម្តេចកិត្តិព្រឹទ្ធបណ្ឌិតមិនបានរៀបការតាមបែបប្រពៃណី និងឱ្យគគ្រឹកគគ្រេង​ឡើយ​ដោយ​សារ​តែ​កាលនោះគឺប្រជាជនកម្ពុជាកំពុងតែរងទុក្ខវេទនាក្នុងសម័យរបបប្រល័យពូជសាសន៍ ប៉ុល ពត។

ជីវិតប្តីប្រពន្ធរវាងសម្តេចតេជោ និងសម្តេចកិត្តិព្រឹទ្ធបណ្ឌិតក្នុងសម័យ ប៉ុល ពត នោះគឺគ្មាន​ឡើយ​សេចក្តី​សុខ​។ សម្តេចតេជោ និងសម្តេចកិត្តិព្រឹទ្ធ​បណ្ឌិត​បាន​តស៊ូ​រួម​គ្នា​ឆ្លង​កាត់​ការ​លំបាក​ជា​ច្រើន​ក្នុង​សម័យ​ខ្មែរក្រហមនោះ ប៉ុន្តែយ៉ាងណាលោកទាំងទ្វេមិនដែលបោះបង់គ្នាឡើយ។

ក្នុង​ឱកាសខួបអាពាហ៍ពិពាហ៍៤៩ឆ្នាំនេះ ប្រជាពលរដ្ឋ ជាកូនចៅ បានចង់ចាំ និងគោរព​ជូន​ពរ​ជ័យ សិរីមង្គលបវរមហាប្រសើរ ជូនសម្ដេចតេជោ និងសម្តេចកិត្តិព្រឹទ្ធបណ្ឌិត ព្រមទាំងបុត្រា បុត្រី ចៅប្រុស ចៅស្រី ជាទីស្រឡាញ់ សូមប្រកបដោយសុខភាពល្អបរិបូណ៍ កម្លាំងពលំមាំមួន ជន្មា​យុយឺ​ន​យូរ និងសម្រេចបានជោគជ័យយ៉ាងត្រចះត្រចង់ ក្នុងការបន្តចូលរួមដឹកនាំប្រទេស ដើម្បី​អភិវឌ្ឍ​លើ​គ្រប់វិស័យ មានភាពរីកចម្រើនរុងរឿង ក្រោមដំបូលមហាសន្តិភាព ស្ថិរភាពជានិច្ច​និរន្តរ៍​តរៀ​ង​ទៅ៕ អត្ថបទ៖ វ៉ន ដារ៉ា