​រុស្ស៊ី៖ ក្រុម​អ្នក​ពន្លត់​អគ្គិភ័យ​កាលពី​ថ្ងៃ​ពុធ​ព្យាយាម​ពន្លត់​អណ្ដាតភ្លើង​កំពុង​ឆាបឆេះ​នៅ​ក្នុង​តំបន់ tundra របស់​ប្រទេស​រុស្ស៊ី ស្រប​ពេល​សីតុណ្ហភាព​ធ្លាក់​ចុះ​ក្រោម​សូន្យ​។​ អ្នក​ពន្លត់​អគ្គិភ័យលោក Alexander Bashaev បាន​និយាយ​ខណៈ​កំពុង​ពន្លត់ភ្លើង​ឆេះ​វាលស្មៅ​ដោយ​ប្រើ​មែក​ឈើ​ថា យើង​មិន​អាច​ទទួល​បាន​ការ​ដឹក​ជញ្ជូន​ទឹក​ទេ​។

ពេលនេះ​រថយន្ត​ដឹក​ទឹក​កំពុង​នៅ​តាម​ផ្លូវ ប៉ុន្តែ​ទឹកកក​អស់ហើយ ​ព្រោះ​អាកាសធាតុ​នៅ​ខាងក្រៅ​ត្រជាក់​ខ្លាំង​ពេក​។ ភ្លើង​ដែល​បាន​ឆាប​ឆេះ​នៅ​ក្នុង​តំបន់ Magadan ក្នុង​ភាគ​ខាងកើត​ផុត​របស់​រុស្ស៊ីគឺជា​ភ្លើង​ឆេះ​មួយ ​ក្នុងចំណោម​ភ្លើង​ជាច្រើន​ដែល​បាន​ឆេះ​នៅ​ពេល​ថ្មីៗ​នេះ​នៅ​ក្នុង​ប្រទេស​រុស្ស៊ី​។ ភ្លើង​បាន​ឆាបឆេះវាលស្មៅ​ស្ងួត​ដែល​ស្ថិតនៅ​ចម្ងាយ ​១២​គីឡូម៉ែត្រ​ពី​ភូមិ Arman ជាទី​ដែល​សីតុណ្ហភាព​ត្រជាក់​បាន​ធ្លាក់​ចុះ​ដល់ ​១៧​អង្សា​ក្រោម​សូន្យ​នៅ​ពេលព្រឹក​។ កាលពី​ថ្ងៃ​អង្គារ លោក​ប្រធានាធិបតី​អាមេរិក Joseph Biden បាន​លើក​បញ្ហា​ភ្លើង​ឆេះ​នៅ​តំបន់ tundra និង​បាន​រិះគន់​មេដឹកនាំ​រុស្ស៊ីដែល​មិន​ចូលរួម​សន្និសីទ​ស្ដីពី​បម្រែបម្រួល​អាកាសធាតុ​ របស់​អង្គការសហប្រជាជាតិដែល​នៅតែ​បន្ត​នៅ​ក្នុង​ទីក្រុង Glasgow។​

ប៉ុន្តែ​អ្នកនាំពាក្យ​ទីក្រុង​ក្រឹម​ឡាំងលោក Dmitry Peskov បាន​វាយបក​ទៅលើ​សម្ដី​របស់​លោក Biden វិញ​ដោយ​និយាយ ខណៈ​ដែល​លោក​ទទួលស្គាល់​ពី​ភ្លើង​កំពុង​ឆេះ​នៅ​តំបន់ tundra ថា កុំ​ភ្លេច​ថា​ភ្លើង​ក៏​កំពុង​ឆាបឆេះ​នៅ​ក្នុង​រដ្ឋ California នៅ​ក្នុង​ប្រទេស​ទួរគី និង​ប្រទេស​ផ្សេងទៀត​នៅ​លើ​ពិភព​លោក​ដែរ​។ ហើយ​ទាំងនេះ​ក៏​ជា​ផល​លំបាក​នៃ​បម្រែបម្រួល​អាកាសធាតុ​ ដែល​យើង​ទាំង​អស់​គ្នា​កំពុងប្រឈម​ដូចគ្នា​៕

អត្ថបទ៖ សុខមាន