សភាសហរដ្ឋអាមេរិក បានបញ្ជាក់ជាផ្លូវការនូវការទទួលជ័យជម្នះក្នុងការបោះឆ្នោតរបស់ប្រធានាធិបតីជាប់ឆ្នោតមកពីគណបក្សសាធារណរដ្ឋ លោក Donald Trump កាលពីថ្ងៃចន្ទ (០៦ មករា) ក្នុងអំឡុងពេលសម័យប្រជុំមួយ ក្រោមអធិបតីភាពរបស់អនុប្រធានាធិបតីមកពីបក្សប្រជាធិបតេយ្យ លោកស្រី Kamala Harris ដែលបានចាញ់ការប្រកួតប្រជែងនេះកាលពីខែវិច្ឆិកា។

ការបញ្ជាក់ ដែលបើកផ្លូវសម្រាប់ពិធីឡើងកាន់តំណែងរបស់លោក Trump ក្នុងរយៈពេលពីរសប្តាហ៍ខាងមុខនេះ បានដំណើរការយ៉ាងរលូន ដោយផ្ទុយស្រឡះពី ៤ឆ្នាំមុន នៅពេលដែលហ្វូងអ្នកគាំទ្រលោក Trump បានសម្រុកចូលវិមានកាពីតូល ក្នុងកិច្ចប្រឹងប្រែងមិនបានសម្រេចដើម្បីរារាំងការបញ្ជាក់នៃបរាជ័យរបស់លោក Trump ក្នុងឆ្នាំ២០២០ ទល់នឹងប្រធានាធិបតីបក្សប្រជាធិបតេយ្យ លោក Joe Biden។

លោក Trump បន្តអះអាងដោយមិនពិតថា បរាជ័យរបស់ខ្លួននៅឆ្នាំ២០២០ គឺជាលទ្ធផលនៃការក្លែងបន្លំយ៉ាងទូលំទូលាយ ហើយបានបន្តព្រមានពេញមួយយុទ្ធនាការឆ្នាំ២០២៤ របស់ខ្លួនថា លោកព្រួយបារម្ភពីហេតុការណ៍ស្រដៀងគ្នានោះ រហូតដល់ជ័យជម្នះរបស់លោកនៅថ្ងៃទី០៥ ខែវិច្ឆិកា ទល់នឹងលោកស្រី Harris។

ជាមួយគ្នានេះ លោកព្រឹទ្ធសមាជិក JD Vance ក៏បានចូលរួមនៅក្នុងសភា ខណៈជ័យជម្នះអនុប្រធានាធិបតីរបស់លោក ក៏ត្រូវបានបញ្ជាក់ដោយលោកស្រី Harris ផងដែរ។ ការបញ្ជាក់ផ្លូវការចុងក្រោយបង្ហាញថា លោក Trump បានឈ្នះអង្គបោះឆ្នោតចំនួន ៣១២សំឡេង ទល់នឹង ២២៦សំឡេង របស់លោកស្រី Harris ៕