នៅក្នុងរបាយការណ៍មួយ នាថ្ងៃអង្គារ (ទី៧ ខែមករា) នេះ វិទ្យាស្ថានស្រាវជ្រាវអាកាសធាតុ Agora បានឲ្យដឹងថា ការបំភាយឧស្ម័នផ្ទះកញ្ចក់របស់ប្រទេសអាល្លឺម៉ង់ បានធ្លាក់ចុះ ៣% នៅក្នុងឆ្នាំ២០២៤ បើធៀបទៅនឹងឆ្នាំមុន ដោយការធ្លាក់ចុះនេះ មានចំណែករួមពីកម្សោយផ្នែកសេដ្ឋកិច្ច អាកាសធាតុមិនសូវត្រជាក់ខ្លាំង និងការទទួលបានជោគជ័យផ្នែកគោលនយោបាយអាកាសធាតុ។

យោងតាមរបាយការណ៍នោះ បានឲ្យដឹងថា ការបញ្ចេញឧស្ម័នកាបូនឌីអុកស៊ីត នៅក្នុងប្រទេសសេដ្ឋកិច្ចធំបំផុតរបស់អឺរ៉ុបមួយនេះ បានធ្លាក់ចុះដល់ ៦៥៦លានតោន ដែលស្មើនឹងកម្រិតកាលពីឆ្នាំមុន ដោយថយចុះ ៤៨% ធៀបនឹងឆ្នាំ១៩៩០ និងកាត់បន្ថយចំនួនប្រចាំឆ្នាំជាង ៥%។

អាល្លឺម៉ង់កំពុងប្រឹងប្រែងកាត់បន្ថយការបំភាយឧស្ម័នសរុបចំនួន ៦៥ភាគរយ នៅឆ្នាំ២០៣០ បើធៀបទៅនឹងឆ្នាំ១៩៩០ ហើយការបំភាយឧស្ម័ននៅឆ្នាំ២០២៤ របស់ប្រទេស មានកម្រិត ៣៦លានតោន ទាបជាងចំនួនប្រចាំឆ្នាំដែលកំណត់ដោយច្បាប់ការពារអាកាសធាតុរបស់ខ្លួន។

យោងតាមរបាយការណ៍នោះ បានឲ្យដឹងបន្ថែមថា ការធ្លាក់ចុះសេដ្ឋកិច្ចរបស់អាល្លឺម៉ង់ បានកាត់បន្ថយការបំភាយឧស្ម័នផ្នែកឧស្សាហកម្ម ទោះបីជាវិស័យដឹកជញ្ជូន និងសំណង់ ជាពិសេស បានបង្ហាញកិច្ចប្រឹងប្រែងតិចតួច ក្នុងការអនុវត្តគោលនយោបាយការពារអាកាសធាតុក៏ដោយ។

នាយកវិទ្យាស្ថាន Agora លោក Simon Mueller បាននិយាយថា តែទោះជាយ៉ាងណាក្ដី វិធានការការពារអាកាសធាតុនាពេលថ្មីៗនេះ នៅក្នុងវិស័យអគ្គិសនី ដូចជាការកើនឡើងនៃការប្រើប្រាស់ថាមពលកកើតឡើងវិញជាដើម កំពុងតែបង្កើតបាននូវផលគួរឲ្យកត់សម្គាល់ ដោយលោកបានបន្ថែមថា ការផលិតថាមពលខ្យល់ និងពន្លឺព្រះអាទិត្យខ្ពស់បំផុត បានគ្របដណ្តប់ការប្រើប្រាស់ប្រហែល ៥៥% ក្នុងឆ្នាំ២០២៤៕