ប្រធានាធិបតីអាមេរិកលោក Joe Biden បានខ្ទាស់ដោយខុសច្បាប់នូវការដេញថ្លៃក្នុងតម្លៃ ១៤,៩ពាន់លានដុល្លាររបស់ក្រុមហ៊ុន Nippon Steel របស់ជប៉ុន ដើម្បីទិញក្រុមហ៊ុនដែកថែប US Steel តាមរយៈការលើកឡើងពីសន្តិសុខជាតិ។ នេះបើតាមការចោទប្រកាន់របស់ក្រុមហ៊ុនទាំង២ នៅក្នុងពាក្យបណ្តឹង កាលពីថ្ងៃចន្ទ (ទី៦ ខែមករា)។

ក្រុមហ៊ុនទាំងនេះចង់ឲ្យតុលាការឧទ្ធរណ៍សហព័ន្ធលុបចោលការសម្រេចរបស់លោក Biden ដែលបន្ទច់បង្អាក់កិច្ចព្រមព្រៀងនេះ ដើម្បីឲ្យក្រុមហ៊ុនអាចមាននូវឱកាសមួយផ្សេងទៀត ក្នុងការទទួលបានការយល់ព្រម តាមរយៈការត្រួតពិនិត្យសន្តិសុខជាតិថ្មីដែលមិនមានការរំខានពីឥទ្ធិពលនយោបាយ។

ពាក្យបណ្តឹងនេះ បានចោទប្រកាន់ថា លោក Biden មានអគតិ ចំពោះការសម្រេចរបស់គណៈកម្មាធិការវិនិយោគបរទេស នៅសហរដ្ឋអាមេរិក ដែលពិនិត្យលើការវិនិយោគបរទេស សម្រាប់ហានិភ័យសន្តិសុខជាតិ និងបានរំលោភសិទ្ធិរបស់ក្រុមហ៊ុន ក្នុងការទទួលបាននូវការត្រួតពិនិត្យដោយយុត្តិធម៌។

ការច្របាច់ចូលគ្នានេះ បានក្លាយទៅជាបញ្ហានយោបាយយ៉ាងខ្លាំងក្លា នៅមុនការបោះឆ្នោតប្រធានាធិបតីអាមេរិក ខែវិច្ឆិកា ឆ្នាំ២០២៤ ដោយទាំងលោក Biden របស់គណបក្សប្រជាធិបតេយ្យ និងប្រធានាធិបតីជាប់ឆ្នោត លោក Donald Trump ពីគណបក្សសាធារណរដ្ឋ បានសន្យាថា នឹងរារាំងមិនឲ្យវាកើតឡើងជាដាច់ខាត នៅពេលដែលអ្នកទាំង២ បានឃោសនាទាក់ទាញអ្នកបោះឆ្នោត នៅក្នុងរដ្ឋប្រកួតប្រជែង Pennsylvania ដែលមានទីស្នាក់ការកណ្តាលរបស់ក្រុមហ៊ុន US Steel។ ហើយប្រធានសហជីព United Steelworkers លោក David McCall បានជំទាស់នឹងការចងសម្ព័ន្ធភាពនេះ៕