អាជ្ញាធរថៃបាននិយាយថា តារាសម្តែងភាពយន្តជនជាតិចិនម្នាក់ដែលបានបាត់ខ្លួននៅជិតព្រំដែនប្រទេសថៃជាមួយសហភាពមីយ៉ាន់ម៉ា ត្រូវបានរកឃើញ ខណៈដែលប្រទេសទាំង២ ប្រឹងប្រែងទប់ស្កាត់ផលប៉ះពាល់ពីឧប្បត្តិហេតុលើឧស្សាហកម្មទេសចរណ៍ដ៏សំខាន់របស់ប្រទេសនេះ។

បើយោងតាមរដ្ឋមន្ត្រីក្រសួងទេសចរណ៍ថៃ លោក Sorawong Thienthong បានឲ្យដឹងថា លោក Wang Xing ដែលត្រូវបានគេស្គាល់ថា Xingxing តាមឈ្មោះលើបណ្ដាញសង្គម ត្រូវបានរកឃើញដោយអាជ្ញាធរមីយ៉ាន់ម៉ា កាលពីថ្ងៃចន្ទ (ទី៦ ខែមករា) ហើយត្រូវបានបញ្ជូនត្រឡប់ទៅប្រទេសថៃវិញ នៅថ្ងៃអង្គារ (ទី៧ ខែមករា) នេះ។

គួរបញ្ជាក់ថា បើយោងតាមប្រព័ន្ធផ្សព្វផ្សាយចិន បានរាយការណ៍ថា លោក Wang បានបាត់ខ្លួនកាលពីថ្ងៃទី៤ ខែមករា ពីទីក្រុង Mae Sot របស់ថៃ ជាប់ព្រំដែនមីយ៉ាន់ម៉ា បន្ទាប់ពីរូបលោកបានទៅដល់ប្រទេសនេះ សម្រាប់អ្វីដែលលោកជឿថា ជាការថតកម្មវិធីទូរទស្សន៍។

សេចក្ដីរាយការណ៍ពីការបាត់ខ្លួនរបស់លោក Wang បានបង្កឲ្យមានការជជែកគ្នាយ៉ាងទូឡំទូលាយ នៅលើវេទិកាបណ្ដាញសង្គមរបស់ចិន ដោយអ្នកប្រើប្រាស់មួយចំនួនបានប៉ាន់ស្មានថា រូវលោកប្រហែលជាត្រូវបានគេចាប់ពង្រត់ទៅធ្វើការនៅក្នុងមជ្ឈមណ្ឌលឆបោកមួយ នៅសហភាពមីយ៉ាន់ម៉ា។

មិត្តស្រីរបស់លោក Wang បានអះអាងតាមរយៈការបង្ហោះលើបណ្ដាញសង្គមថា តារាសម្ដែងរូបនេះ បានជិះរថយន្តចេញពីទីក្រុងបាងកក មុនពេលបាត់បង់ការទាក់ទង នៅទីក្រុងជាប់ព្រំដែននោះ៕