នាយករដ្ឋមន្ត្រីកាណាដា លោក Justin Trudeau នៅថ្ងៃអង្គារ (០៧ មករា) បានច្រានចោលការលើកឡើងរបស់ប្រធានាធិបតីជាប់ឆ្នោតអាមេរិក លោក Donald Trump ដែលថា លោកអាចនឹងប្រើ "កម្លាំងសេដ្ឋកិច្ច" ដើម្បីបង្ខំឱ្យកាណាដា ក្លាយជារដ្ឋទី៥១ របស់សហរដ្ឋអាមេរិក។

លោក Trudea បាននិយាយនៅក្នុងការបង្ហោះនៅលើបណ្ដាញសង្គម X ថា "មិនមានឱកាសសូម្បីតែបន្តិច ដែលកាណាដានឹងក្លាយជាផ្នែកនៃសហរដ្ឋអាមេរិក។ ប្រជាជននៃប្រទេសទាំងពីរទទួលបានអត្ថប្រយោជន៍ពីការធ្វើជាដៃគូពាណិជ្ជកម្ម និងសន្តិសុខធំបំផុតរបស់គ្នាទៅវិញទៅមក"។

នៅពេលត្រូវសាកសួរថាតើលោកកំពុងពិចារណាប្រើប្រាស់កម្លាំងយោធាដើម្បីយកកាណាដា មកធ្វើជារដ្ឋអាមេរិកឬទេ លោក Trump ឆ្លើយតបថា៖ "ទេ គឺប្រើកម្លាំងសេដ្ឋកិច្ច ដោយសារតែកាណាដា និងសហរដ្ឋអាមេរិក ពិតជាក្លាយជាការរួមបញ្ជូលដ៏ល្អ"។

លោក Trump ដែលបានត្អូញត្អែរជាយូរមកហើយអំពីអតិរេកពាណិជ្ជកម្មរបស់កាណាដាជាមួយសហរដ្ឋអាមេរិក បានប្រាប់អ្នកសារព័ត៌មានថា ព្រំដែនរវាងភាំគីទាំងពីរគឺជា "បន្ទាត់សិប្បនិម្មិតប៉ុណ្ណោះ"។ លោក Trump ក៏បានគំរាមដាក់ពន្ធ ២៥% លើការនាំចូលពីកាណាដា ដែលមានទំនាក់ទំនងពាណិជ្ជកម្មយ៉ាងជិតស្និទ្ធជាមួយទីក្រុងវ៉ាស៊ីនតោន៕