មេដឹកនាំគណបក្សសេរីភាព (FPO) ស្តាំនិយមជ្រុលរបស់អូទ្រីស លោក Herbert Kickl បានអំពាវនាវឱ្យបក្សប្រជាជន (OVP) អភិរក្សនិយម មានភាពស្មោះត្រង់ក្នុងកិច្ចពិភាក្សាចម្រុះដែលជិតមកដល់របស់ពួកគេ បើមិនដូច្នេះទេនឹងប្រឈមមុខនឹងការបោះឆ្នោតមុនកំណត់មួយ ដែលមើលឃើញគាំទ្ររបស់បក្សស្ដាំនិយមជ្រុល FPO នៅតែបន្តកើនឡើង ហើយបក្សអភិរក្សនិយម OVP នៅតែធ្លាក់ចុះ។

បក្ស FPO ដែលរិះគន់សហភាពអឺរ៉ុប និងរួសរាយដាក់រុស្ស៊ី បានឈ្នះការបោះឆ្នោតសភាចុងក្រោយនៅក្នុងខែកញ្ញា ជាមួយនឹងសំឡេងឆ្នោតប្រហែល ២៩% ប៉ុន្តែមិនត្រូវបានគេអើពើទេ ខណៈបក្សកណ្តាលនិយម បានព្យាយាមបង្កើតក្រុមចម្រុះដោយគ្មានវត្តមាន FPO។

កិច្ចខិតខំប្រឹងប្រែងនោះមិនជោគជ័យឡើយ ដោយជំរុញឱ្យលោកប្រធានាធិបតី Alexander van der Bellen ដាក់ភារកិច្ចឱ្យក្រុមស្ដាំនិយមជ្រុលបង្កើតរដ្ឋាភិបាល ដែលផ្តល់ឱកាសឱ្យលោក Kickl ក្លាយជាអធិការបតីមកពីបក្ស FPO ទីមួយរបស់អូទ្រីស ចាប់តាំងពីបក្សនេះបានបង្កើតឡើងក្នុងទសវត្សរ៍ឆ្នាំ១៩៥០ មក។

ការនាំយកឱនភាពថវិកាត្រឡប់មកវិញក្នុងដែនកំណត់នៃទិន្នផលសេដ្ឋកិច្ច ៣% របស់សហភាពអឺរ៉ុប គឺជាចំណុចជាប់គាំងដ៏សំខាន់នៅក្នុងកិច្ចពិភាក្សាក្រុមចម្រុះ។ គេមិនច្បាស់ទេថាតើ បក្ស FPO និង OVP អាចសម្រេចរឿងនោះតាមរបៀបណា ដោយសារភាគីទាំងពីរចង់បន្ថយចំណាយរបស់រដ្ឋាភិបាលជាជាងការដំឡើងពន្ធ ប៉ុន្តែបានខ្វែងគំនិតគ្នាត្រង់បញ្ហាដ៏រសើបដូចជាការកាត់បន្ថយប្រាក់សោធនជាដើម៕