អាជ្ញាធរបាននិយាយនៅថ្ងៃពុធ (០៨ មករា) នេះថា យន្តហោះលើទឹកខ្នាតតូចមួយគ្រឿង ដែលដឹកអ្នកទេសចរអឺរ៉ុប បានធ្លាក់ចូលទៅក្នុងសមុទ្រនៅរដ្ឋ វេសស្ទើន អូស្ត្រាលី (Western Australia) របស់ប្រទេសអូស្ត្រាលី ដោយបានសម្លាប់មនុស្ស ៣នាក់នៅលើនោះ។

យន្តហោះបានធ្លាក់កាលពីល្ងាចថ្ងៃអង្គារ បន្ទាប់ពីចាកចេញពីកោះ រ៉ូតនេស (Rottnest) ដែលជាកន្លែងទាក់ទាញភ្ញៀវទេសចរដ៏ល្បីល្បាញដោយសារសត្វសមុទ្រដ៏គួរឱ្យស្រឡាញ់នៅទីនោះ។ ខណៈដែលក្រុមស្វែងរក បានស្រង់បំណែកយន្តហោះពីសមុទ្រនៅថ្ងៃពុធ ប្រមុខរដ្ឋ លោក Roger Cook បានបញ្ជាក់ថា មនុស្ស ៣នាក់បានស្លាប់ និង ៤នាក់ទៀតនៅរស់រានមានជីវិត។

ក្នុងចំណោមជនរងគ្រោះមានស្ត្រីអាយុ ៦៥ឆ្នាំមកពីប្រទេសស្វីស បុរសអាយុ ៦០ឆ្នាំមកពីប្រទេសដាណឺម៉ាក និងអ្នកបើកយន្តហោះក្នុងស្រុកអាយុ ៣៤ឆ្នាំ។ មានសេចក្តីរាយការណ៍ថា យន្តហោះបានប៉ះនឹងដុំថ្ម ខណៈពេលកំពុងហោះឡើង ប៉ុន្តែមូលហេតុពិប្រាកដនៅមិនទាន់ដឹងនៅឡើយទេ។

ដោយស្ថិតនៅចម្ងាយប្រហែល ៣០គីឡូម៉ែត្រភាគខាងលិចនៃរដ្ឋធានី Perth របស់រដ្ឋ Western Australia កោះ Rottnest គឺជាគោលដៅទេសចរណ៍ដ៏សំខាន់មួយរបស់ប្រទេស៕