ប្រធានាធិបតីចិន លោក ស៊ី ជីនពីង (Xi Jinping) បានបញ្ជាឱ្យអាជ្ញាធរធ្វើកិច្ចខិតខំប្រឹងប្រែងគ្រប់បែបយ៉ាងទាំងអស់ ដើម្បីជួយសង្គ្រោះអ្នករួចរស់ជីវិត និងកាត់បន្ថយផលប៉ះពាល់ បន្ទាប់ពីគ្រោះរញ្ជួយដីកម្រិត ៦,៨ រ៉ិចទ័រ ដែលធ្វើឱ្យមានអ្នកស្លាប់យ៉ាងច្រើន បន្ទាប់ពីវាយប្រហារស្រុកមួយក្នុងតំបន់ទីបេ ដែលចិន ហៅថាតំបន់ស្វយ័ត ស៊ីចាង (Xizang) ភាគនិរតីនៃប្រទេស នៅព្រឹកថ្ងៃអង្គារ (០៧ មករា)។

លោក Xi បានចេញអនុសាសន៍ និងបទបញ្ជាដ៏សំខាន់មួយ ដោយទាមទារឱ្យមានការខិតខំប្រឹងប្រែងអស់ពីសមត្ថភាព ដើម្បីអនុវត្តការស្វែងរក និងជួយសង្គ្រោះ និងផ្តល់ការព្យាបាលវេជ្ជសាស្រ្តដល់អ្នករបួស។ លោកក៏បានជំរុញឱ្យអាជ្ញាធរទប់ស្កាត់គ្រោះមហន្តរាយបន្ទាប់បន្សំ ការតាំងទីលំនៅថ្មីឱ្យបានត្រឹមត្រូវ និងដោះស្រាយផលប៉ះពាល់ប្រកបដោយប្រសិទ្ធភាព។

មនុស្សសរុបចំនួន ១២៦នាក់ត្រូវបញ្ជាក់ថាបានស្លាប់ និង ១៨៨នាក់ផ្សេងទៀតបានរងរបួស បន្ទាប់ពីគ្រោះរញ្ជួយដីដ៏កាចសាហាវនោះ ដោយបានបំផ្លិចបំផ្លាញលំនៅឋានក្នុងតំបន់ជនបទរាប់ពាន់ខ្នងនៅលើជម្រាលភាគខាងជើងនៃភ្នំហិម៉ាឡៃ។

រញ្ជួយដីបានកើតឡើងនៅម៉ោង ៩:០៥នាទីព្រឹក (ម៉ោងនៅទីក្រុងប៉េកាំង) ដោយចំណុចកណ្តាលស្ថិតនៅភូមិ Tsogo នៃស្រុក Dingri ក្នុងតំបន់ទីបេ។ មានភូមិចំនួន ២៧ និងប្រជាជនប្រមាណ ៦.៩០០នាក់ នៅក្នុងរង្វង់ ២០គីឡូម៉ែត្រ ពីចំណុចកណ្តាលនៃគ្រោះរញ្ជួយដីនោះ៕