បន្ទាប់ពីមានកំណើនសេដ្ឋកិច្ចដ៏លេចធ្លោរបស់ពិភពលោក កាលពីឆ្នាំមុន អ្នកបង្កើតគោលនយោបាយរបស់ប្រទេសឥណ្ឌា កំពុងប្រឹងប្រែងទប់ស្កាត់ការធ្លាក់ចុះយ៉ាងលឿន ខណៈដែលស្ថានភាពពិភពលោកមានសភាពកាន់តែអាក្រក់ទៅៗ ហើយទំនុកចិត្តក្នុងស្រុក បានលុបបំបាត់ភាពរឹងមាំរបស់ទីផ្សារភាគហ៊ុននាពេលថ្មីៗនេះទាំងស្រុង។

កាលពីថ្ងៃអង្គារ (ទី៧ ខែមករា) ប្រទេសសេដ្ឋកិច្ចធំទី៣ របស់អាស៊ី បានព្យាករពីកំណើនប្រចាំឆ្នាំចំនួន ៦,៤ភាគរយ ក្នុងឆ្នាំសារពើពន្ធដែលបញ្ចប់ក្នុងខែមីនា ជាកំណើនយឺតបំផុត ក្នុងរយៈពេល ៤ឆ្នាំ និងទាបជាងការព្យាករណ៍ដំបូងរបស់រដ្ឋាភិបាល ដែលបានជះឥទ្ធិពលអវិជ្ជមានដោយសារការធ្លាក់ចុះជាងមុននៃការវិនិយោគ និងការផលិត។

ការទម្លាក់នេះកើតឡើងបន្ទាប់ពីមាននូវសន្ទស្សន៍សេដ្ឋកិច្ចដ៏ខ្សោយ និងការធ្លាក់ចុះនៃប្រាក់ចំណូលសាជីវកម្ម នៅក្នុងឆមាសទី២ ឆ្នាំ២០២៤ ដែលបានជំរុញឲ្យវិនិយោគិនគិតឡើងវិញនូវកំណើនដ៏ល្អប្រសើរពីមុនរបស់ប្រទេស ហើយបានបង្ហាញការសង្ស័យលើគោលដៅសេដ្ឋកិច្ចដ៏មានមហិច្ឆតារបស់នាយករដ្ឋមន្ត្រី លោក Narendra Modi។

ការព្រួយបារម្ភថ្មីនេះ កំពុងបង្កើនការអំពាវនាវកាន់តែខ្លាំងឡើងៗឲ្យអាជ្ញាធរលើកកម្ពស់ទស្សនវិស័យ ដោយការបន្ធូរបន្ថយគោលនយោបាយរូបិយវត្ថុ និងពន្យឺតល្បឿននៃការរឹតបន្តឹងសារពើពន្ធ ជាពិសេសនៅពេលដែលការលេចឡើងនូវតំណែងប្រធានាធិបតីអាណត្តិទី២ របស់លោក Donald Trump បានបង្កឲ្យមានភាពមិនច្បាស់លាស់បន្ថែមទៀតលើទស្សនវិស័យពាណិជ្ជកម្មសកល។

ទោះបីជាឥណ្ឌានៅតែជាប្រទេសមានដំណើរការសេដ្ឋកិច្ចល្អជាសកលក៏ដោយ ក៏ការរក្សាបាននូវអត្រាកំណើនខ្ពស់ នឹងពឹងផ្អែកលើការជំរុញការចំណាយរបស់អ្នកប្រើប្រាស់ ការងារ និងការប្រកួតប្រជែងពាណិជ្ជកម្មសកល៕