ប្រធានាធិបតីស្វ៊ីសលោកស្រី Karin Keller-Sutter បានប្រកាសពីការត្រៀមខ្លួនរបស់ប្រទេសលោកស្រីក្នុងការដើរតួ ជាអ្នកសម្រុះសម្រួល ក្នុងការដោះស្រាយវិបត្តិអ៊ុយក្រែន។

សេចក្តីថ្លែងការណ៍មួយនៅលើគេហទំព័រ Keller Sutter នៅលើបណ្តាញសង្គម X បានឲ្យដឹងថា៖«ក្នុងអំឡុងពេលទូរស័ព្ទថ្ងៃនេះ ជាមួយលោកប្រធានាធិបតី ហ្សេឡិស្គី ( Zelensky) ខ្ញុំបានធានាចំពោះគាត់អំពីការគាំទ្រជាបន្តបន្ទាប់របស់ប្រទេសស្វ៊ីស ជាពិសេសតាមរយៈគម្រោងមនុស្សធម៌ និងការកសាងឡើងវិញរយៈពេលវែងរបស់យើង បូករួមទាំងឆន្ទៈរបស់យើង ក្នុងការរួមចំណែកដល់ដំណើរការសន្តិភាព តាមរយៈការជួយរបស់ប្រទេសស្វ៊ីស។

នៅចុងខែធ្នូ រដ្ឋមន្ត្រីការបរទេសស្វ៊ីស លោក Ignazio Cassis បាននិយាយថា ប្រទេសរបស់លោកមើលឃើញថា ខ្លួនជាផ្នែកនៃដំណោះស្រាយចំពោះវិបត្តិអ៊ុយក្រែន ហើយថា អព្យាក្រឹតភាព និងការខិតខំប្រឹងប្រែងរបស់សហព័ន្ធ ក្នុងការបង្កើតសន្តិភាព នៅអ៊ុយក្រែន គឺជា «តម្លៃបន្ថែម» របស់ខ្លួន។

នាពេលមុននេះ ក្រសួងការបរទេសស្វ៊ីស បានប្រាប់សារព័ត៌មាន TASS ថា អាជ្ញាធររបស់ប្រទេសនេះ កំពុងចូលរួមក្នុងការរៀបចំការចរចាស្តីពីការបង្កើតបទឈប់បាញ់នៅអ៊ុយក្រែន ប៉ុន្តែមិនមានការពិភាក្សាអំពីការរៀបចំអ្វីដែលគេហៅថា សន្និសីទសន្តិភាពថ្មីមួយនោះទេ។