ប្រធានាធិបតីទួរគីលោក រ៉េសិប តាយីប អឺដូហ្កាន់ (Recep Tayyip Erdogan) បានជួបជាមួយលោក Masrour Barzani នាយករដ្ឋមន្ត្រីនៃរដ្ឋាភិបាលតំបន់ឃើដឌីស្តង់ (KRG) របស់ប្រទេសអ៊ីរ៉ាក់ កាលពីថ្ងៃអង្គារ នៅទីក្រុងអង់ការ៉ា ដើម្បីពិភាក្សាអំពីទំនាក់ទំនង និងបញ្ហាក្នុងតំបន់។

យោងតាមសេចក្តីថ្លែងការណ៍របស់ការិយាល័យប្រធានាធិបតីទួរគី បានឲ្យដឹងថា កិច្ចប្រជុំនេះ បានបង្ហាញពីការប្តេជ្ញាចិត្តរបស់ទួរគី ក្នុងការរក្សាស្ថិរភាព និងសន្តិសុខរបស់ប្រទេសអ៊ីរ៉ាក់ ជាពិសេសចំពោះការវិវឌ្ឍ នៅក្នុងប្រទេសស៊ីរី។

លោក អឺដូហ្កាន់ បានសង្កត់ធ្ងន់លើកិច្ចខិតខំប្រឹងប្រែងរបស់ប្រទេសទួរគី ក្នុងការទប់ស្កាត់អស្ថិរភាពបន្ថែមទៀត នៅក្នុងតំបន់ និងបានបង្ហាញពីជំហររបស់លោកថា អនាគតរបស់ប្រទេសស៊ីរី គួរតែគ្មានអង្គការភេរវកម្ម និងសាខារបស់ពួកគេ។ នេះបើយោងតាមសេចក្តីថ្លែងការណ៍នោះ។

ការិយាល័យរបស់លោក បានបញ្ជាក់ថា លោក អឺដូហ្កាន់ ក៏បានលើកឡើងពីភាពចាំបាច់នៃការអនុវត្តគម្រោង ដើម្បីបង្កើនស្ថិរភាព និងវិបុលភាព នៅទូទាំងតំបន់។

ដំណើរទស្សនកិច្ចរបស់លោក Barzani ទៅកាន់ប្រទេសទួរគី បានកើតឡើង ចំពេលមានការពិភាក្សាជាបន្តបន្ទាប់ ក្នុងចំណោមគណបក្សនយោបាយក្នុងតំបន់ ដែលមានគោលបំណងដោះស្រាយអំពើភេរវកម្មដែលធ្វើឡើងដោយគណបក្សពលករឃើដ (PKK) នៅក្នុងប្រទេសនេះ។