រដ្ឋមន្ត្រីការបរទេសបារាំង នៅថ្ងៃពុធ (ទី៨ ខែមករា) នេះ បាននិយាយថា ការដាក់ទណ្ឌកម្មរបស់សហភាពអឺរ៉ុប (EU) លើប្រទេសស៊ីរី ដែលជាឧបសគ្គដល់ការផ្តល់ជំនួយមនុស្សធម៌ និងរារាំងដល់ការស្តារឡើងវិញរបស់ប្រទេសនេះ អាចត្រូវបានដកចេញយ៉ាងឆាប់រហ័ស។

គួរដឹងថា បន្ទាប់ពីរបបគ្រប់គ្រងរបស់លោក Bashar al-Assad ត្រូវបានបបញ្ចប់ សហរដ្ឋអាមេរិក កាលពីថ្ងៃទី៦ ខែធ្នូ ឆ្នាំ២០២៤ បានចេញការលើកលែងទណ្ឌកម្ម សម្រាប់ប្រតិបត្តិការជាមួយស្ថាប័នសំខាន់ៗ នៅក្នុងប្រទេសស៊ីរី រយៈពេល ៦ខែ ដើម្បីព្យាយាមសម្រាលដល់លំហូរនៃជំនួយមនុស្សធម៌។

ដោយថ្លែងទៅកាន់វិទ្យុ France Inter រដ្ឋមន្ត្រីការបរទេស លោក Jean-Noel Barrot បានប្រាប់ថា EU អាចធ្វើការសម្រេចស្រដៀងគ្នានេះ ក្នុងពេលឆាប់ៗនេះ ដោយមិនបានផ្តល់ពេលវេលាច្បាស់លាស់ជាក់លាក់ ខណៈដែលលោកបានបន្ថែមថា ការដកទណ្ឌកម្មផ្នែកនយោបាយបន្ថែមទៀត នឹងអាស្រ័យលើរបៀបដែលមេដឹកនាំថ្មីរបស់ស៊ីរី បានដោះស្រាយចំពោះដំណើរការផ្ទេរអំណាច និងធានាបាននូវបរិយាបន្នកម្ម។

លោក Barrot ដែលបានជួបមេដឹកនាំជាក់ស្ដែងស៊ីរី លោក Ahmed al-Sharaa កាលពីថ្ងៃទី៣ ខែមករា ជាមួយរដ្ឋមន្ត្រីការបរទេសអាល្លឺម៉ង់ បាននិយាយថា៖ «មានផ្សេងទៀត (ទណ្ឌកម្ម) ដែលបច្ចុប្បន្នជាឧបសគ្គដល់ការទទួលបានជំនួយមនុស្សធម៌ ដែលរារាំងដល់ការងើបឡើងវិញរបស់ប្រទេសនេះ។ ទាំងនេះ (ទណ្ឌកម្ម) អាចនឹងត្រូវបានដកចេញយ៉ាងឆាប់រហ័ស»។

លោកបានបន្ថែមថា៖ «ចុងក្រោយ មានទណ្ឌកម្មផ្សេងទៀតដែលយើងកំពុងពិភាក្សាជាមួយដៃគូអឺរ៉ុបរបស់យើង ដែលអាចត្រូវបានដកចេញ ប៉ុន្តែជាក់ស្តែងអាស្រ័យលើល្បឿនដែលការរំពឹងទុករបស់យើង ចំពោះស៊ីរី ពាក់ព័ន្ធនឹងស្ត្រី និងសន្តិសុខ ត្រូវបានយកមកពិចារណា»។

អ្នកការទូតអ៊ឺរ៉ុប ៣នាក់ ដែលនិយាយក្នុងលក្ខខណ្ឌមិនបញ្ចេញឈ្មោះ បានឲ្យដឹងថា EU នឹងស្វែងរកការ ព្រមព្រៀងគ្នា ដើម្បីលុចចោលទណ្ឌកម្មមួយចំនួន នៅពេលរដ្ឋមន្ត្រីការបរទេសនៃសមាជិកទាំង ២៧ប្រទេសរបស់ប្លុក ជួបប្រជុំគ្នានៅទីក្រុងប៊្រុចសែល ប្រទេសបែលហ្ស៊ិក នៅថ្ងៃទី២៧ ខែមករាខាងមុខនេះ៕