​បាល់ទាត់៖ ​ខ្សែការពារ​សញ្ជាតិ​អង់គ្លេស Trevoh Chalobah បាន​ចុះហត្ថលេខា​បន្ត​កិច្ចសន្យា​ជាមួយ​ក្រុម​តោ​ខៀវ Chelsea ៤ឆ្នាំ​បន្ថែម​ដែល​នឹង​រក្សា​រូបគេ​នៅ Stamford Bridge ដល់​ឆ្នាំ២០២៦​។​ ​បានបង្ហាញ​ខ្លួន ១០ប្រកួត​រដូវ​កាល​នេះ​ឱ្យ​ក្រុម​របស់លោក Thomas Tuchel កីឡាករ​វ័យ ២២ឆ្នាំ​រូបនេះ​ធ្វើឱ្យការចាប់អារម្មណ៍​នៅ Stamford Bridge​។

​​Chalobah បាន​ហៅ​ការបន្ត​កិច្ចសន្យា​នេះ​ថា ជា​ក្តី​សុ​បិ​ន្ត​ក្លាយជា​ការពិត​ដែល​បាន​បន្ត​អាជីព​រយៈពេល​យូរ​ ជាមួយ​ក្លិប​ដែល​គេ​រួមរស់​ជាមួយ​តាំងពីក្មេង​។ ​ប្រកួត​ដំបូង​របស់ Chalobah នៅ​ក្រុម​ធំ Chelsea គឺ​កាលពី​ដើមរដូវ​កាល​នេះ​ដោយ​រកបាន ១​គ្រាប់​ដ៏​អស្ចារ្យ​ឱ្យ Chelsea យកឈ្នះ Crystal Palace ថ្ងៃ​បើក​រដូវ​កាល​។ ​បន្ទាប់ពី​ឡើង​ពី​ក្រុមយុវជន​មានឈ្មោះ​ក្នុង​ក្រុម​ធំ​កាលពី Chelsea ស្ថិតក្រោម​ការដឹកនាំរ​ប​ស់លោក Antonio Conte កាលពី​ឆ្នាំ២០១៨ Trevoh Chalobah បាន​ចំណាយពេល​ ៣​ឆ្នាំ​ជា​កីឡាករ​ខ្ចី​ជើង​នៅ Ipswich Town, Huddersfield Town និង​ក្លិប​បារាំង Lorient​។

​​Trevoh Chalobah ជា​កីឡាករ​ជំរើសជាតិ​ជា​ច្រើនប្រភេទ​អាយុ​ឱ្យ​អង់គ្លេស​រួមមាន U16, U17, U19, U20 និង U21​។​ ​Chelsea កំពុង​នាំមុខ​នៅ English Premier League ក្រោយ​លេង​បាន ១០ប្រកួត​រកបាន ២៥ពិន្ទុ​ខណៈ​ស្អែក​នេះ​នឹងត្រូវ​បើកទ្វារ​ផ្ទះ​ទទួល​ស្វាគមន៍ Burnley៕

​អត្ថបទ​៖​នាង សុភា​វុ​ធ