សហរដ្ឋអាមេរិក ត្រូវបានគេរំពឹងថានឹងប្រកាសជំនួយយោធាថ្មីចំនួន ៥០០លានដុល្លារ សម្រាប់អ៊ុយក្រែន នៅថ្ងៃព្រហស្បតិ៍ (០៩ មករា) នេះ ក្នុងជំនួបចុងក្រោយនៃការសន្យាជំនួយយោធារបស់លោកប្រធានាធិបតី Joe Biden ហើយជាកិច្ចប្រជុំដែលទីក្រុងគីវ និយាយថាមានសារៈសំខាន់ចំពោះការការពារប្រឆាំងនឹងប្រទេសរុស្ស៊ី។

ក្រុមទំនាក់ទំនងការពារជាតិអ៊ុយក្រែន (UDCG) មានសម្ព័ន្ធមិត្តប្រហែល ៥០ប្រទេស ដែលតែងតែជួបរៀងរាល់ពីរបីខែម្តងនៅឯមូលដ្ឋានទ័ពអាកាស Ramstein ក្នុងប្រទេសអាល្លឺម៉ង់ ត្រូវបានចាប់ផ្តើមដោយរដ្ឋមន្ត្រីការពារជាតិអាមេរិក លោក Lloyd Austin នៅឆ្នាំ២០២២ ដើម្បីបង្កើនល្បឿន និងធ្វើសមកាលកម្មការបញ្ជូនអាវុធទៅកាន់ទីក្រុងគីវ។

អនាគតរបស់ក្រុមនេះមិនច្បាស់លាស់ទេ ជាមួយនឹងលោកប្រធានាធិបតីជាប់ឆ្នោត Donald Trump ដែលនឹងចូលកាន់តំណែងនៅថ្ងៃទី២០ ខែមករា។ ទីប្រឹក្សារបស់លោក Trump បានបង្ហើបសំណើដើម្បីបញ្ចប់សង្រ្គាមអ៊ុយក្រែន ដែលនឹងប្រគល់ផ្នែកដ៏ធំរបស់ប្រទេសនេះ ទៅឱ្យរុស្ស៊ី សម្រាប់អនាគតដ៏ខ្លីខាងមុខ។

មន្ត្រីអាមេរិកមួយរូបបាននិយាយថា រដ្ឋាភិបាលក្រុងវ៉ាស៊ីនតោន បានសន្យាផ្តល់ជំនួយសន្តិសុខជាង ៦៣,៥ ពាន់លានដុល្លារដល់អ៊ុយក្រែន ចាប់តាំងពីជម្លោះចាប់ផ្ដើមជាមួយរុស្ស៊ី ហើយប្រាក់បន្ថែមចំនួន ៥០០ លានដុល្លារនេះ អាចត្រូវបានប្រកាសនៅពេលឆាប់ៗនេះ៕