កងទ័ពអាកាសអ៊ុយក្រែន បាននិយាយកាលពីថ្ងៃព្រហស្បតិ៍ (០៩ មករា) ថា រុស្ស៊ីបានបាញ់បង្ហោះគ្រាប់បែករាវរកគោលដៅប្រើប្រព័ន្ធទូរបញ្ជាពីលើអាកាសជាង ៥១.០០០គ្រាប់ ប្រឆាំងនឹងអ៊ុយក្រែន ចាប់តាំងពីការចាប់ផ្តើមប្រតិបត្តិការយោធារបស់ខ្លួនកាលពីជិត ៣ឆ្នាំមុន។

គ្រាប់បែកសម្ងំរង់ចាំគោលដៅ ឬរាវរកគោលដៅ គឺមានការបំផ្លិចបំផ្លាញខ្លាំងក្លា ហើយពិបាកស្ទាក់ចាប់ណាស់។ សព្វាវុធដែលបាញ់បង្ហោះតាមអាកាសនេះ គឺជាអាវុធធម្មតា ហើយជាញឹកញាប់ផលិតនៅសម័យសូវៀត ដែលត្រូវបានបំពាក់ដោយស្លាប និងប្រព័ន្ធរាវរកដោយផ្កាយរណប ដើម្បីពង្រីករយៈចម្ងាយ និងភាពជាក់លាក់របស់វា។

គ្រឿងយុទ្ធោបករណ៍នោះមានតម្លៃថោកជាងមីស៊ីលបាលីស្ទិក និងមីស៊ីលតម្រង់គោលដៅ ដែលរុស្សី បាញ់ជាប្រចាំនៅអ៊ុយក្រែន ហើយមានចំនួនច្រើនក្រៃលែង។ ឥទ្ធិពលបំផ្លិចបំផ្លាញខ្លាំងក្លារបស់គ្រប់បែក មានន័យថាវាអាចបំផ្លាញសូម្បីតែទីតាំងការពាររបស់អ៊ុយក្រែន ដែលបានពង្រឹងយ៉ាងខ្លាំងក្លា។

កងទ័ពអាកាសបាននិយាយនៅក្នុងសេចក្តីថ្លែងការណ៍របស់ខ្លួននៅលើកម្មវិធីផ្ញើសារតេលេក្រាមថា នៅឆ្នាំ២០២៤ រុស្ស៊ីបានប្រើប្រាស់គ្រាប់បែករាវរកគោលដៅចំនួន ៤០.០០០គ្រាប់ នៅអ៊ុយក្រែន។ មន្ត្រីអ៊ុយក្រែន និយាយថា តំបន់ដែលនៅជិតខ្សែបន្ទាត់ជួរមុខ ក៏ដូចជាតំបន់ជាប់ព្រំដែនរុស្ស៊ី ត្រូវបានគេកំណត់គោលដៅជាប្រចាំបំផុតជាមួយនឹងអាវុធបែបនេះ។

អាជ្ញាធរអ៊ុយក្រែន និយាយថា មធ្យោបាយដ៏មានប្រសិទ្ធភាពបំផុតក្នុងការទប់ទល់នឹងការវាយប្រហារដោយគ្រាប់បែកកំណត់គោលដៅ គឺបាញ់សំដៅទៅលើយន្តហោះចម្បាំងដែលដឹកពួកវា និងឃ្លាំងផ្ទុកអាវុធទាំងនោះ៕