អត្រានៃការគាំទ្រ ចំពោះគណបក្សប្រឆាំងឈានមុខគេរបស់កូរ៉េខាងត្បូងដែលបាន និងកំពុងដឹកនាំយុទ្ធនាការចោទប្រកាន់ទម្លាក់តំណែងប្រធានាធិបតី លោក Yoon Suk Yeol បានធ្លាក់ចុះ ខណៈដែលអ្នកស៊ើបអង្កេតព្យាយាមចាប់ខ្លួនមេដឹកនាំដែលកំពុងជួបប្រទះនឹងបញ្ហាប្រឈមធ្ងន់ធ្ងរ។

អត្រាពេញចិត្ត ចំពោះបក្សប្រឆាំង គឺគណបក្សប្រជាធិបតេយ្យ (DP) បានធ្លាក់ចុះដល់ ៣៦ភាគរយ នៅក្នុងការស្ទង់មតិដែលត្រូវបានចេញផ្សាយ នៅថ្ងៃសុក្រ (ទី១០ ខែមករា) នេះ ដោយវិទ្យាស្ថានស្រាវជ្រាវ Gallup Korea ដោយបាត់សំឡេងគាំទ្រ ១២ភាគរយពីការស្ទង់មតិ នាពេលមុនដែលត្រូវបានចេញផ្សាយ កាលពីខែធ្នូឆ្នាំមុន។

ចំណែកឯអត្រាគាំទ្រ ចំពោះគណបក្សអំណាចប្រជាជន (PPP) របស់លោក Yoon បានកើនដល់ ៣៤ភាគរយ ដោយឡើងពីចំនួន ២៤ភាគរយ ក្នុងអំឡុងពេលដូចគ្នា ពោលគឺលើសពីកម្រិតដែលត្រូវបានរាយការណ៍ប៉ុន្មានថ្ងៃមុនពេលមានក្រឹត្យច្បាប់អាជ្ញាសឹករបស់លោក Yoon។

វិទ្យាស្ថាន Gallup Korea បានឲ្យដឹងថា ការស្ទង់មតិចុងក្រោយបំផុត ត្រូវបានធ្វើឡើង ក្នុងចំណោមអ្នកឆ្លើយសំណួរចំនួន ១,០០៤នាក់ នៅទូទាំងប្រទេស ហើយកម្រិតល្អៀងនៃលទ្ធផលនេះអាចទាប ឬខ្ពស់ជាងគ្នា ៣,១ភាគរយ។ ការធ្លាក់ចុះប្រជាប្រិយភាពរបស់ក្រុមប្រឆាំង កើតមានបន្ទាប់ពីការចោទប្រកាន់ទម្លាក់តំណែងលើលោកនាយករដ្ឋមន្ត្រី Han Duck-soo ដែលបានកាន់តួនាទីជាប្រធានាធិបតីស្តីទីមួយរយៈខ្លី និងការបរាជ័យរបស់ក្រុមអ្នកស៊ើបអង្កេតក្នុងការចាប់ខ្លួនលោក Yoon កាលពីសប្តាហ៍មុន បន្ទាប់ពីមានការប្រឈមមុខដាក់គ្នាអស់រយៈពេលមួយម៉ោងជាមួយក្រុមសន្តិសុខរបស់លោក។

ចំនួនអ្នកឆ្លើយតបដែលគាំទ្រឲ្យមេដឹកនាំបក្សប្រឆាំង លោក Lee Jae-myung ក្លាយជាប្រធានាធិបតីបន្ទាប់ ក៏បានធ្លាក់ចុះផងដែរមកត្រឹម ៣២ភាគរយ ដោយធ្លាក់ពី ៣៧ភាគរយ នៅក្នុងការស្ទង់មតិមុន ដែលបានធ្វើឡើងប៉ុន្មានថ្ងៃបន្ទាប់ពីមានការចោទប្រកាន់លើលោក Yoon កាលពីថ្ងៃទី១៤ ខែធ្នូឆ្នាំមុន។ ការស្ទង់មតិចុងក្រោយបានបង្ហាញថា អ្នកឆ្លើយសំណួរ ៦៤ភាគរយ គាំទ្រការចោទប្រកាន់ទម្លាក់តំណែងលោក Yoon ខណៈ ៣២ភាគរយ ប្រឆាំងនឹងយុទ្ធនាការនេះ៕