គណៈកម្មាធិការអង្គការសហប្រជាជាតិ (UN) កាលពីថ្ងៃព្រហស្បតិ៍ (ទី៩ ខែមករា) បានឲ្យដឹងនៅក្នុងសេចក្តីថ្លែងការណ៍ថា ខ្លួនបានរកឃើញថា ប្រទេសអូស្ត្រាលីបានរំលោភលើសន្ធិសញ្ញាសិទ្ធិមនុស្ស ដោយការឃុំឃាំងក្រុមអ្នកស្វែងរកសិទ្ធិជ្រកកោន ក្នុងនោះរួមមានទាំងអនីតិជនផងដែរ នៅលើកោះដាច់ស្រយាល Nauru នៅមហាសមុទ្រប៉ាស៊ីហ្វិក សូម្បីតែពួកគេត្រូវបានផ្តល់ឋានៈជាជនភៀសខ្លួនក៏ដោយ។

នៅក្រោមគោលនយោបាយអន្តោប្រវេសន៍ដ៏តឹងតែងរបស់អូស្ត្រាលី អ្នកដែលព្យាយាមទៅដល់ប្រទេសនេះដោយទូក ត្រូវបានបញ្ជូនទៅបជ្ឈមណ្ឌលឃុំខ្លួននានា ក្នុងនោះរួមទាំងនៅលើកោះ Nauru ដែនដីតំបន់ប៉ាស៊ីហ្វិកខាងត្បូង ជាអ្វីដែលគេហៅថា «ដំណើរកាឃុំឃាំងនៅក្រៅប្រទេស» ចាប់តាំងពីឆ្នាំ២០១៣ មក។ ទីតាំងឃុំខ្លួនបែបនេះពីមុនត្រូវបានពិនិត្យដោយក្រុមសិទ្ធិមនុស្ស។

គណៈកម្មាធិការសិទ្ធិមនុស្សរបស់ UN ដែលត្រួតពិនិត្យលើកតិកាសញ្ញាអន្តរជាតិចងដោយច្បាប់ឆ្នាំ១៩៦៦ ស្តីពីសិទ្ធិពលរដ្ឋ និងនយោបាយ និងដែលត្រូវបានស្នើឲ្យពិចារណាលើពាក្យបណ្តឹងរបស់ក្រុមជនភៀសខ្លួន បានរកឃើញថា ប្រទេសអូស្ត្រាលីបានរំលោភលើបទប្បញ្ញត្តិពីរនៃសន្ធិសញ្ញានេះ ដែលនោះគឺមួយពាក់ព័ន្ធនឹងការឃុំខ្លួនដោយបំពាន និងមួយទៀតពាក់ព័ន្ធនឹងការការពារសិទ្ធិ ពោលគឺបានឃុំខ្លួនពួកគេ ដោយមិនបានឆ្លងកាត់តុលាការ។

ជាមួយគ្នានេះ គណៈកម្មាធិការបានស្នើឲ្យអូស្ត្រាលីផ្តល់សំណងដល់ជនរងគ្រោះ និងធានាថា ការរំលោភស្រដៀងគ្នានេះ មិនកើតឡើងម្តងទៀតនោះឡើយ។

គោលនយោបាយឃុំខ្លួនអ្នកស្វែងរកសិទ្ធិជ្រកកោនរបស់ប្រទេសអូស្ត្រាលីនៅក្រៅប្រទេស ទទួលបានការគាំទ្រពីអ្នកបោះឆ្នោត។ រដ្ឋាភិបាលរបស់ប្រទេសនេះ លើកឡើងថា អ្នកជាប់ឃុំត្រូវបានប្រព្រឹត្តចំពោះដោយសេចក្តីថ្លៃថ្នូរ យុត្តិធម៌ និងការគោរព ហើយផ្តល់លទ្ធភាពឲ្យទទួលបានសេវាគាំទ្រជាច្រើន៕