សហរដ្ឋអាមេរិក និងចក្រភពអង់គ្លេសកាលពីថ្ងៃសុក្រ បានប្រកាសដាក់ទណ្ឌកម្មថ្មីប្រឆាំងនឹងឧស្សាហកម្មថាមពលរបស់រុស្ស៊ី។

ប្រធានាធិបតីអាមេរិកលោក Joe Biden បានប្រកាសពីការដាក់ទណ្ឌកម្មជុំថ្មីប្រឆាំងនឹងសេដ្ឋកិច្ចរបស់   រុស្ស៊ី កាលពីថ្ងៃសុក្រ ដោយផ្តោតលើក្រុមហ៊ុនប្រេង Gazprom Neft និង Surgutneftegas ដែលជាក្រុមហ៊ុនប្រេងធំជាងគេពីររបស់ប្រទេសនេះ និងនាវាដឹកប្រេងចំនួន ១៨៣គ្រឿង។

មន្ត្រីសេតវិមាន បានបញ្ជាក់ថា ទណ្ឌកម្មទាំងនេះ គឺជាវិធានការធ្ងន់ធ្ងរបំផុត ប្រឆាំងនឹងវិស័យថាមពលរបស់រុស្ស៊ី រហូតមកដល់បច្ចុប្បន្ន ក្នុងគោលបំណងកាត់ផ្តាច់ប្រភពថវិកាដ៏សំខាន់សម្រាប់ជម្លោះរុស្ស៊ី-អ៊ុយក្រែន។ វិធានការថ្មីនេះ ក៏រួមបញ្ចូលផងដែរនូវការទប់ស្កាត់អង្គភាពពាក់ព័ន្ធថាមពលជាច្រើន និងការរឹតបន្តឹងលើការចូលប្រើប្រាស់របស់រុស្ស៊ីចំពោះប្រាក់ចំណូលប្រាក់ដុល្លារពីការនាំចេញថាមពល។

សហរដ្ឋអាមេរិក ក៏បានដាក់ទណ្ឌកម្មយ៉ាងតឹងរ៉ឹងលើក្រុមហ៊ុន NIS ដែលជាក្រុមហ៊ុនថាមពលដ៏ធំរបស់ប្រទេសស៊ែប៊ី ដោយនិយាយថា ក្រុមហ៊ុននេះ មានទំនាក់ទំនងជាមួយក្រុមហ៊ុនប្រេង និងឧស្ម័នរុស្ស៊ីទាំង  ពីរ។

រដ្ឋាភិបាលអង់គ្លេស ក៏បានចេញសេចក្តីថ្លែងការណ៍មួយកាលពីថ្ងៃសុក្រ ដើម្បីដាក់ទណ្ឌកម្មលើក្រុមហ៊ុនប្រេងយក្សរុស្ស៊ីទាំងពីរ។ សេចក្តីថ្លែងការណ៍ បានលើកឡើងថា ប្រាក់ចំណេញដែលទទួលបានដោយក្រុមហ៊ុនទាំងពីរ គឺផ្តល់ហិរញ្ញប្បទានដល់ជម្លោះដែលកំពុងបន្តរវាងរុស្ស៊ី និងអ៊ុយក្រែន។

ក្រសួងហិរញ្ញវត្ថុរបស់ប្រទេសអ៊ុយក្រែនបានប្រកាសកាលពីថ្ងៃសុក្រថា ខ្លួនបានទទួលប្រាក់ចំនួន ៣ ពាន់លានអឺរ៉ូ (ប្រហែល ៣.០៩ពាន់លានដុល្លារអាមេរិក) ពីសហភាពអឺរ៉ុប (EU) ដែលគាំទ្រដោយប្រាក់ចំណូលនៃទ្រព្យសម្បត្តិរបស់រុស្ស៊ី ដែលបានបង្កក។