ចំនួនមនុស្សដែលរងផលប៉ះពាល់ដោយទឹកជំនន់ នៅរដ្ឋ Johor របស់ប្រទេសម៉ាឡេស៊ី បានឡើងដល់ជាង ៣.០០០នាក់ហើយ គិតត្រឹមព្រឹកថ្ងៃអាទិត្យ (ទី១២ ខែមករា) ដែលកាលពីយប់មុននោះ មានចំនួន ២.៥២៤នាក់។

ទីភ្នាក់ងារគ្រប់គ្រងគ្រោះមហន្តរាយជាតិ (NADMA) របស់ប្រទេសនេះ នៅក្នុងរបាយការណ៍មួយ បានឲ្យដឹងថា មនុស្សចំនួន ៣.២៩៥នាក់នៃក្រុមគ្រួសារដែលរងផលប៉ះពាល់ចំនួន ៩៦០គ្រួសារ មកពីតំបន់ទីក្រុង Kota Tinggi, Kulai, Johor Bahru, Kluang និង Pontian។ ពួកគេត្រូវបានបញ្ជូនទៅមជ្ឈមណ្ឌលជម្លៀសបណ្តោះអាសន្នចំនួន ៣៤កន្លែង។

សារព័ត៌មាន The New Straits Times បានរាយការណ៍ថា នាយកដ្ឋានឧតុនិយមម៉ាឡេស៊ីព្យាករថា នឹងមានភ្លៀងធ្លាក់ខ្លាំងបន្តទៀត ដោយលទ្ធភាពនាំឲ្យមានទឹកជំនន់ នៅក្នុងតំបន់ផ្សេងទៀត ក្នុងនោះរួមទាំងនៅទីក្រុង Batu Pahat និង Mersing ផងដែរ។

នៅមុននេះ សារព័ត៌មាន The Star បានរាយការណ៍ថា បុរសម្នាក់ត្រូវបានជួយសង្គ្រោះ បន្ទាប់ពីរថយន្តរបស់គេ បានហូរទៅតាមខ្សែទឹក នៅលើផ្លូវ Jalan Liku Cina ក្បែរទីក្រុង Taman Aman។ យ៉ាងណាក្ដី មកទល់នឹងព្រឹកថ្ងៃអាទិត្យនេះ មិនទាន់មានរបាយការណ៍ពីអ្នកររបួស និងស្លាប់នៅឡើយទេ។

គួរបញ្ជាក់ថា ទឹកជំនន់ គឺជារឿងធម្មតានៅតំបន់ឆ្នេរភាគខាងកើតនៃប្រទេសម៉ាឡេស៊ី អំឡុងរដូវខ្យល់មូសុងប្រចាំឆ្នាំ ចាប់ពីខែតុលាដល់ខែមីនា ដោយមនុស្សរាប់ពាន់នាក់ត្រូវបានបង្ខំឲ្យចាកចេញពីផ្ទះសម្បែងជារៀងរាល់ឆ្នាំ៕