ប្រទេសវេណេហ្ស៊ុយអេឡា កាលពីថ្ងៃសៅរ៍ (ទី១១ ខែមករា) បានថ្កោលទោសទណ្ឌកម្មថ្មីដែលសហរដ្ឋអាមេរិក អង់គ្លេស និងសហភាពអឺរ៉ុប (EU) បានប្រកាសដាក់នៅមួយថ្ងៃមុននោះ នៅពេលដែលប្រទេសនេះរៀបចំពិធីស្បថចូលកាន់តំណែងរបស់ប្រធានាធិបតីនី លោក Nicolas Maduro សម្រាប់អាណត្តិទី៣ បន្ទាប់ពីមានលទ្ធផលបោះឆ្នោតពេញដោយជម្លោះរយៈពេល ៦ខែ។

ក្នុងសេចក្ដីថ្លែងការណ៍ ដែលត្រូវបានបបង្ហោះនៅបណ្ដាញសង្គម មេបញ្ជាការប្រតិបត្តិការយុទ្ធសាស្ត្រនៃកងកម្លាំងប្រដាប់អាវុធជាតិវេណេហ្ស៊ុយអេឡា គឺលោកឧត្តមសេនីយ៍ Domingo Hernandez Larez បានលើកឡើងថា៖ «កងកម្លាំងប្រដាប់អាវុធវេណេហ្ស៊ុយអេឡា បដិសេធយ៉ាងដាច់អហង្ការ និងខ្លាំងក្លា ចំពោះទណ្ឌកម្មថ្មី ដែលដាក់ដោយក្រុមប្រទេសសម្ព័ន្ធមិត្តចក្រពត្តិដ៏អាក្រក់»។ លោកបានហៅការដាក់ទណ្ឌកម្មនេះថា ជា «វិធានការអស់សង្ឃឹម និងក្រៅច្បាប់អន្តរជាតិ»។

ការថ្កោលទោសនេះ បានកើតឡើងបន្ទាប់ពីរដ្ឋបាលជិតផុតអាណត្តិរបស់ប្រធានាធិបតីអាមេរិក លោក Joe Biden បានបង្កើនប្រាក់រង្វាន់ដល់ ២៥លានដុល្លារ សម្រាប់ព័ត៌មានដែលនាំទៅដល់ការចាប់ខ្លួន ឬការកាត់ទោសលោក Maduro ជុំវិញការចោទប្រកាន់ពីបទជួញដូរគ្រឿងញៀន។ រង្វាន់ពីមុន គឺ ១៥លានដុល្លារ។

សហរដ្ឋអាមេរិកក៏បានផ្ដល់រង្វាន់ ២៥លានដុល្លារផងដែរ សម្រាប់ការចាប់ខ្លួនរដ្ឋមន្ត្រីមហាផ្ទៃ លោក Diosdado Cabello និង ១៥លានដុល្លារ សម្រាប់រដ្ឋមន្ត្រីការពារជាតិ លោក Vladimir Padrino ក៏ដូចជាការដាក់ទណ្ឌកម្មថ្មីប្រឆាំងនឹងមន្ត្រី ៨នាក់ផ្សេងទៀត ក្នុងនោះរួមទាំងប្រធានក្រុមហ៊ុនប្រេងរដ្ឋ PDVSA គឺលោក Hector Obregon ផងដែរ។

ចំណាត់ការរបស់សហរដ្ឋអាមេរិកនេះ កើតមានឡើងស្របគ្នានឹងការដាក់ទណ្ឌកម្មដោយចក្រភពអង់គ្លេស និងសហភាពអឺរ៉ុប ដែលបានកំណត់គោលដៅលើមន្ត្រី ១៥នាក់ ក្នុងនោះរួមទាំងសមាជិកក្រុមប្រឹក្សាជាតិរៀបចំការបោះឆ្នោត និងកងកម្លាំងសន្តិសុខ ហើយការដាក់ទណ្ឌកម្មរបស់កាណាដា ផ្តោតលើមន្ត្រីបច្ចុប្បន្ន និងអតីត ១៤នាក់៕