ប្រធានាធិបតីជាប់ឆ្នោតរបស់សហរដ្ឋអាមេរិក លោក Donald Trump បានចោទប្រកាន់មន្ត្រីរដ្ឋកាលីហ្វ័រនីញ៉ា កាលពីថ្ងៃអាទិត្យ ទី១២ មករា ថា អសមត្ថភាព ជុំវិញការដោះស្រាយចំហេះព្រៃដ៏មហន្តរាយដែលកំពុងឆេះរាលដាលនៅជុំវិញទីក្រុង Los Angeles ។

លោក Trump បាននិយាយនៅលើវេទិកា Truth Social របស់លោកថា «ចំហេះព្រៃនៅតែឆេះរាលដាលនៅក្នុងទីក្រុង Los Angeles។ អ្នកនយោបាយអសមត្ថភាព មិនដឹងពីរបៀបដើម្បីពន្លត់ចំហេះព្រៃនេះទេ។

នេះគឺជាមហន្តរាយដ៏អាក្រក់បំផុតមួយ នៅក្នុងប្រវត្តិសាស្ត្រប្រទេសរបស់យើង។ ពួកគេ មិនអាចពន្លត់ភ្លើងព្រៃបាន។ ល្បឿន និងកម្រិតនៃអណ្តាតភ្លើង ឆេះរាលដាលនៅទីក្រុង Los Angeles បានសាកល្បងការពន្លត់អគ្គិភ័យឆាបឆេះហេដ្ឋារចនាសម្ព័ន្ធ ដែលបានបង្កឱ្យមានចម្ងល់ និងការរិះគន់អំពីការត្រៀមទប់ទល់របស់រដ្ឋនេះ។

នៅត្រឹមតែជាងមួយសប្តាហ៍ មុនពេលលោកត្រឡប់ទៅកាន់សេតវិមានវិញ លោក Trump បានចាប់ផ្តើមការចោទប្រកាន់គ្មានភស្តុតាងជាបន្តបន្ទាប់លើអភិបាលរដ្ឋកាលីហ្វ័រនីញ៉ាមកពីគណបក្សប្រជាធិបតេយ្យ លោក Gavin Newsom ពីការបរាជ័យក្នុងការឆ្លើយតបទៅនឹងចំហេះព្រៃ។

ទន្ទឹមនឹងនេះ លោក Newsom បានអញ្ជើញលោក Trump ឱ្យទៅពិនិត្យមើលទីក្រុង Los Angeles និងស្ទង់មើលការបំផ្លិចបំផ្លាញ ជាមួយលោក។

យោងតាមមន្ត្រីរដ្ឋ បានឲ្យដឹងថា រហូតមកដល់ពេលនេះ ចំហេះព្រៃបានបណ្តាលឲ្យមនុស្សយ៉ាងហោចណាស់២៤នាក់ស្លាប់ មនុស្ស១៥០.០០០នាក់ទៀតបានជម្លៀសខ្លួនចេញ ហើយអគ្គិភ័យបានបំផ្លាញសំណង់ជាង១២.០០០កន្លែង ។