សម្ព័ន្ធយោធាប្រទេសលោកខាងលិច NATO កំពុងបង្កើនការល្បាតនៅសមុទ្របាល់ទិក បន្ទាប់ពីបំពង់បង្ហូរប្រេង និងខ្សែកាប្លិ៍នៅក្រោមសមុទ្រ ត្រូវបានបំផ្លាញក្នុងប៉ុន្មានឆ្នាំថ្មីៗនេះ។ កាលពីថ្ងៃទី២៥ ខែធ្នូ បណ្តាញថាមពលមួយ និងខ្សែកាប្លិ៍ទំនាក់ទំនងចំនួន៣ខ្សែ ដែលតភ្ជាប់ប្រទេសហ្វាំងឡង់ និងប្រទេសអេស្តូនី នៅក្នុងដែនទឹកអឺរ៉ុបខាងជើង ត្រូវបានបញ្ជាក់ថារងការបំផ្លាញ។

អាជ្ញាធរប្រទេសហ្វាំងឡង់ បានសង្ស័យថា នាវាដឹកប្រេងអាចកាត់ផ្តាច់ខ្សែកាប្លិ៍ដោយការអូសយុថ្ការបស់នាវា។ រដ្ឋមន្ត្រីការបរទេសប្រទេសអេស្តូនី លោក Margus Tsahkna បាននិយាយថា លោកសង្ស័យថា ការបំផ្លាញនេះកើតឡើងដោយចៃដន្យ ហើយបានពណ៌នាឧប្បត្តិហេតុនេះថាជាការវាយប្រហារលើហេដ្ឋារចនាសម្ព័ន្ធសំខាន់ៗ របស់ប្រទេស។

កាលពីខែវិច្ឆិកា ខ្សែកាប្លិ៍ទំនាក់ទំនងក្រោមសមុទ្រចំនួនពីរខ្សែដែលតភ្ជាប់ប្រទេសស៊ុយអែត និងប្រទេសលីទុយអានី ត្រូវបានបំផ្លាញ។ នៅខែតុលា ឆ្នាំ២០២៣ ការខូចខាត ក៏ត្រូវបានរកឃើញផងដែរ ចំពោះបំពង់បង្ហូរប្រេងក្រោមបាតសមុទ្រ និងខ្សែកាប្លិ៍ទូរគមនាគមន៍ រវាងប្រទេសអេស្តូនី និងហ្វាំងឡង់។

អង្គការណាតូ បាននិយាយពីលទ្ធភាពដែលរុស្ស៊ីរៀបចំ «ការវាយប្រហារកូនកាត់» ជាការប៉ុនប៉ងធ្វើឱ្យមានការរំខានដោយការបញ្ចូលវិធីសាស្រ្តយោធា និងពុំមែនយោធា។

ប្រទេសអេស្តូនី ដែលជាសមាជិកសម្ព័ន្ធយោធាណាតូ កំពុងចូលរួមក្នុងការបង្កើនការល្បាតនៅសមុទ្របាល់ទិក។

បណ្តាមេដឹកនាំប្រទេសសម្ព័ន្ធយោធាណាតូ នៅជុំវិញសមុទ្របាល់ទិក និងអគ្គលេខាធិការសម្ព័ន្ធមិត្ត យោធានេះ លោក Mark Rutte មានផែនការជួបប្រជុំគ្នានៅក្នុងប្រទេសហ្វាំងឡង់ នៅថ្ងៃអង្គារ ដើម្បីពិភាក្សាអំពីវិធានការសន្តិសុខ នៅក្នុងតំបន់។