កុមារជាច្រើនមកពីភូមិ Gadan ក្នុងក្រុង Dingri ដែលរងគ្រោះដោយរញ្ជួយដី ជាតំបន់ស្វយ័ត Xizang ភាគនិរតីប្រទេសចិន បានសម្តែងការអរគុណរបស់ពួកគេចំពោះក្រុមអ្នកជួយសង្គ្រោះ និងសង្ឃឹមសម្រាប់អនាគតដ៏ល្អប្រសើរ តាមរយៈគំនូរ និងពាក្យសម្ដីរបស់ពួកគេ។

ការរញ្ជួយដីកម្រិត៦,៨ រិចទ័រ បានវាយប្រហារក្រុង Dingri និងក្រុង Xigaze នៅម៉ោង ០៩:០៥ នាទី កាលពីថ្ងៃទី៧ ខែមករា ដោយបានឆក់យកជីវិតមនុស្សចំនួន១២៦នាក់។

ជាមួយនឹងការងារស្តារ និងកសាងឡើងវិញក្រោយគ្រោះមហន្តរាយដែលកំពុងដំណើរការ ក្រុមអ្នកជួយសង្គ្រោះ បានសាងសង់ទីតាំងកម្សាន្តបណ្តោះអាសន្នសម្រាប់កុមារក្នុងតំបន់ ដើម្បីជួយផ្នែកផ្លូវចិត្តរបស់ពួកគេពីគ្រោះមហន្តរាយ។ ក្រុមសង្គ្រោះបានសាងសង់ទីលានបាល់ទាត់ និងបន្ទប់គូរគំនូរតូចមួយ ដែលបានក្លាយជាកន្លែងដ៏ពេញចិត្តរបស់កុមារយ៉ាងឆាប់រហ័ស នៅទីតាំងលំនៅថ្មី។

គំនូររបស់កុមារគឺសុទ្ធតែទាក់ទងទៅនឹងបទពិសោធន៍ថ្មីៗរបស់ពួកគេ ដែលពួកគេចាប់អារម្មណ៍ខ្លាំងបំផុតក្នុងរយៈពេលប៉ុន្មានថ្ងៃកន្លងទៅនេះ។ កុមារបានគូររូបអ្នកពន្លត់អគ្គិភ័យ និងលំនៅឋានថ្មីនៅក្នុងក្តីស្រមៃរបស់ពួកគេ។

កុមារម្នាក់ និយាយថា «បំណងប្រាថ្នារបស់ខ្ញុំ គឺចង់ឱ្យគ្រោះមហន្តរាយបញ្ចប់ទៅឆាប់ៗ ហើយឱ្យផ្ទះរបស់យើងត្រូវបានសាងសង់ឡើងវិញយ៉ាងឆាប់រហ័ស ដូច្នេះយើងអាចមានកន្លែងរស់នៅដ៏រីករាយ»។ កុមារម្នាក់ទៀតនិយាយថា «ខ្ញុំចង់ធ្វើជាទាហានបម្រើប្រជាជន»។ រីឯកុមារទីបីនិយាយថា «ខ្ញុំចង់ធ្វើការជា វេជ្ជបណ្ឌិត ព្រោះវេជ្ជបណ្ឌិតអាចជួយមនុស្សជាច្រើននាក់ឲ្យបានធូរស្រាល»។

កុមារម្នាក់ទៀតនិយាយថា «ខ្ញុំចង់ធ្វើឱ្យខ្លួនឯងកាន់តែរឹងមាំ ដូច្នេះប្រសិនបើមានគ្រោះមហន្តរាយកើតឡើងម្តងទៀត ខ្ញុំអាចជួយមនុស្សជាច្រើន និងផ្តល់ជំនួយផ្នែកហិរញ្ញវត្ថុដល់មនុស្សកាន់តែច្រើន និងនៅកន្លែងដែលត្រូវការ»។